बिहेका गहना आफ्ना पसलमा नकिने भन्दै सर्लाहीका सुन पसलेले सुँगुर खोरमा थुनेर दिए यातना

मलंगवा– सर्लाहीको पर्सा गाउँपालिका–५ का तस्लिम अन्सारीले छोरीको बिहेको गहना नकिन्दा सुन पसलेको कठोर यातना सहनु परेको छ।

उनलाई सुँगुरको खोरमा थुनेर यातना दिई भिडिओ सामाजिक सञ्जालमा पोस्ट गरेको समेत फेला परेको जिल्ला प्रहरी कार्यालय सर्लाहीले जनाएको छ। घटनामा संलग्न दुवै पक्षका गरि ६ जनालाई प्रहरीले पक्राउ गरेको छ। 

सुन पसले राजेन्द्र साह सुनासहितका व्यक्तिले गहना नकिनेको भन्दै सुँगुरको खोरभित्र थुनेर यातना दिएका थिए। 

यही जेठ ८ गते छोरीको विवाहको तयारीमा रहेका तस्लिमले साहको पसलमा गहना नकिनेको निहुँमा घटना भएको हो। सुन पसल सञ्चालन गर्दै आएका सुनारले अन्सारीलाई आफ्नो पसलमा गहना किन्नको लागि विभिन्न ढंगले दबाब दिँदै आएका प्रहरी अनुसन्धानबाट खुलेको छ।

दबाबपछि एक चरण गाउँमा छलफल समेत भैसकेको प्रहरीले पत्ता लगाएको छ। प्रहरीका अनुसार छलफलमा अन्सारी र उनका दाइ दिल महमद अन्सारीले राजेन्द्र साहलाई थप्पड लगाएको पनि रहेछन्।

त्यहि रिसमा राजेन्द्र र उनका छोरा कमलेशले गएको शनिबार अन्सारीलाई सुँगुरको खोरमा थुनेर यातना दिएको पाइएको र यसमा थप अनुसन्धान जारी रहेको प्रहरीले जनाएको छ।

सुँगुरको खोरमा थुनेर अन्सारीलाई यातना दिने राजेन्द्र, उनका छोरा कमलेश, छोराका साथीहरु पप्पुकमार यादव र राहुलकुमार महतोलाई पनि प्रहरीले पक्राउ गरेको छ। 

त्यसैगरि छलफलमा बसेको बेला राजेन्द्रलाई थप्पड लगाएको आरोपमा तस्लिम र उनका दाजु दिल महमदलाई पनि पक्राउ गरिएको छ। 

यो घटनाका सम्बन्धमा दुवै पक्षले प्रहरीमा उजुरी दिएका छन्। तसलिम पक्षले राजेन्द्रसहितको समूहलाई अधर्म र अमानवीय व्यवहार सम्बन्धी कसुरमा उजुरी दिएका छन् भने राजेन्द्रले पनि अभद्र व्यहार सम्बन्धी कसुरमा प्रहरीमा उजुरी गरेका छन्। 

अधर्म सम्बन्धी कसुरमा सात दिन र अभद्र व्यवहार सम्बन्धी कसुरमा पाँच दिनको म्याद थप गरेर उनीहरुमाथि अनुसन्धान जारी रहेको प्रहरीले जनाएको छ।