पाकिस्तानका लागि जासुसी गरेको आरोपमा भारतीय युट्युबर पक्राउ

काठमाडौ  - भारतीय प्रहरीले हरियाणाको हिसारमा बस्ने चर्चित ट्राभल भ्लगर ज्योति मल्होत्रालाई पाकिस्तानका लागि जासुसी गरेको आरोपमा पक्राउ गरेको छ। 

३३ वर्षीया मल्होत्रा, जो ‘ट्राभल विथ जो’ नामक युट्युब च्यानल चलाउँदै आएकी थिइन्। उनीमाथि पाकिस्तानी गुप्तचर संस्था (आईएसआई) सँग संवेदनशील जानकारी साझा गरेको आरोप छ। उनको युट्युब च्यानलमा ३ लाख ७७ हजारभन्दा बढी सब्सक्राइबर र इन्स्टाग्राममा एक लाख ३२ हजार फलोअर छन्।

हरियाणा प्रहरीको जासुस–विरोधी विभागले १६ मेमा मल्होत्रालाई हिसारको नयाँ अग्रसेन एक्सटेन्सनबाट पक्राउ गरेको हो। प्रहरीको प्रारम्भिक अनुसन्धान (एफआईआर) अनुसार उनले व्हाट्सएप, टेलिग्राम र स्न्यापच्याटमार्फत पाकिस्तानी उच्चायोगका कर्मचारी एहसान उर रहिम उर्फ दानिशसँग गोप्य सम्पर्क राखेकी थिइन्। 

दानिश १३ मेमा जासुसीको आरोपमा भारतबाट निष्कासित भएका थिए। मल्होत्राको युट्युब च्यानलमा ‘इन्डियन गर्ल इन पाकिस्तान’, ‘इन्डियन गर्ल एक्सप्लोरिंग लाहोर? ‘इन्डियन गर्ल एट कटास राज टेम्पल’ जस्ता भिडियोहरू अपलोड भएका छन्, जसलाई प्रहरीले उनको जासुसी गतिविधिको आवरण मानेको छ।

प्रहरीका अनुसार मल्होत्राले सन् २०२३ मा दानिशको सहयोगमा कम्तीमा दुई पटक पाकिस्तान भ्रमण गरेकी थिइन्। पाकिस्तानमा रहँदा उनले आईएसआईका एजेन्टहरू (अली अहवान, शाकिर र राणा शाहबाज)सँग भेट गरेकी थिइन्। भारत फर्किएपछि उनले संवेदनशील जानकारीहरू पाकिस्तानी जासुसहरूलाई पठाउन थालिन्। 

मार्च २०२४ मा नयाँ दिल्लीस्थित पाकिस्तानी उच्चायोगमा आयोजित इफ्तार डिनरमा दानिशसँग भेट गरेको भिडियो पनि प्रमाणका रूपमा पेश गरिएको छ। भिडियोमा उनले पाकिस्तान भ्रमण गर्ने इच्छा व्यक्त गरेकी थिइन्। अनुसन्धानले मल्होत्रा हरियाणा र पञ्जाबमा फैलिएको ठूलो जासुसी सञ्जालको हिस्सा भएको उल्लेख गरेको छ। उनले पाकिस्तानी गुप्तचरसँग घनिष्ठ सम्बन्ध राखेको, जसमा एकजनासँग इन्डोनेसियाको बाली भ्रमण गरेको भारतीय सञ्चारमाध्यमले जानकारी दिएका छन्। 

भारत र पाकिस्तानबिच बढ्दो तनावको समयमा यो कारबाही गरिएको हो। २२ अप्रिलमा कश्मीरको पहलगाममा भएको आतंकवादी हमलामा २६ सर्वसाधारणको मृत्यु भएको थियो। त्यसपछि भारतले पाकिस्तान र पाकिस्तान–नियन्त्रित कश्मीरमा आतंकवादी संरचनामाथि कारबाही गरेको गरेको थियो। जवाफमा पाकिस्तानले पनि भारतमाथि हमला गरेको थियो। तर अमेरिकी दबाबमा आएर दुवै देशले युद्धविराम गरे। 

सोही आरोपमा मल्होत्रासहित हरियाणा र पञ्जाबका अन्य छ जना पनि पक्राउ परेको भारतीय प्रहरीले जानकारी दिएको छ। उनलाई १६ मेमा अदालतमा पेश गरिएको थियो। अदालतले प्रहरीलाई पाँच दिन हिरासतमा राखेर अनुसन्धान गर्न अनुमति दिएको छ।