गुन्डा समूह सल्बलाउन थालेपछि ‘इन्काउन्टर’ योजना तयार पार्दै प्रहरीका खास निकाय!

काठमाडौं– बिगत केही महिनादेखि गुन्डाका समूह सक्रिय हुन थालेपछि शान्ति सुरक्षामा प्रहरीलाई चुनौती थपिन थालेको छ।

एक दशकअघि प्रहरीले विविध घटनामा इन्काउन्टरलाई प्राथमिकतामा राखेको थियो। एकाध इन्काउन्टर भएपछि गुन्डा समूह ‘अन्डरग्राउन्ड’ भएका थिए। तर यतिबेला राजनीतिक गतिविधिमा प्रहरी व्यस्त भएको समय पारी विभिन्न गुन्डा समूह सक्रिय हुन थालेपछि सुरक्षा चुनौती थपिएको विश्लेषण प्रहरीका खास निकायले गरेका छन्।

उच्च स्रोतका अनुसार पछिल्ला दिनमा गुन्डागर्दी तल्लो तहसम्म नै सल्बलाउनेगरी गतिविधि भएपछि प्रहरीका अपराध नियन्त्रण गर्ने निकाय ‘इन्काउन्टर’को योजनामा जान सक्ने बताइन्छ। 

गुण्डा नाइके राम अकिलसिंह गुरुङसहितका व्यक्तिले गत वैशाख २६ गते राति अशोक समूहमा रहेका विवस तामाङ र अशोक तामाङका छोरामाथि खुकुरी प्रहार भएको धादिङको पछिल्लो घटना हो। 

यसअघि कर्तव्य ज्यानमुद्दामा समेत कैद सजाय भोगेर बाहिर आएका अमर तामाङ, झ्याप्ले भन्ने अमर तामाङ, राम अकिलसिंह गुरुङ, सौजल गुरुङ र प्रविन कटुवालको समूहले खुकरी प्रहार गरेको स्थानीयले बताएका छन्।

प्रहरीले खुकुरी प्रहार भएको घटना पुष्टि गरेको छ। जाहेरी आएको पनि उसले जनाएको छ।

सुत्केरी महिलालाई उपचारका लागि खनियावास गाउँपालिका–४ दार्खास्थित स्वास्थ्यचौकीमा पुगेका दुई युवामाथि खुकुरी प्रहार भएको घटना सार्वजनिक भएको हो। खुकुरी प्रहारबाट विवस तामाङ गम्भीर घाइते भएको पाइएको छ। राती ११ बजेर ३५ मिनेट जाँदा विवसमाथि खुकुरी प्रहार भएको हो।

घाइते तामाङको उपचारका लागि धादिङ हुँदै काठमाडौं ल्याइएको छ। काठमाडौंमा सिटीस्क्यान र एमआरआई गरिएको रिपोर्टमा देखिन्छ।

घटनापछि पीडित परिवारले अभियुक्तहरुविरुद्ध किटानी जाहेरी समेत दिए पनि प्रहरीले त्यसलाई गम्भीरतापूर्वक अनुसन्धान नगरी पक्राउ नगरेको पीडित परिवारको गुनासो छ। प्रहरी निरीक्षकको नेतृत्वमा कमाण्ड तयार पारिएको छ। 

यस्ता गतिविधिका विषयमा प्रहरीको अपराध अनुसन्धान कार्यालयलाई पनि जानकारी गराइएको छ। खुकुरी प्रहार गर्ने व्यक्तिहरु धादिङमा गुन्डागर्दीमा एकाधिकार जमाउने कोशिशमा लागेका समूहको रहेको प्रहरी अध्ययनले देखाउँछ।

पछिल्ला दिनमा काठमाडौंमा पनि दिउँसै, रेष्टुरेन्ट र बारमा आक्रमणका घटना भएका थिए। ‘अहिले अपराधलाई प्रश्रय दिने काममा गुन्डा नाइके लागिरहेको भन्ने हामी सूचना संकलन गरिरहेका छौं, प्रहरीले आवश्यक कानुनी उपचारको योजना पनि बनाउनेछ’, प्रहरी उच्च स्रोतले भन्यो,‘अपराध न्यूनिकरण र नियन्त्रणमा प्रधान कार्यालयको निर्देशनअनुसार कडाईका साथ लागिनेछ।’