निजामती कर्मचारी विधेयकमा उदासीनता देखाएको भन्दै माओवादीले जनायो आपत्ति

काठमाडौँ- नेकपा (माओवादी केन्द्र)का सांसद पूर्णबहादुर घर्तीले सरकारले शिक्षा र निजामती कर्मचारी विधेयकमा उदासीनता देखाएको भन्दै आपत्ति जनाएका छन् ।

प्रतिनिधि सभाको बिहीबारको बैठकमा बोल्दै सांसद घर्तीले निजामती विधेयकमा उदासीनता र भूमि विधेयकमा हतारो किन ? भन्दै प्रश्न गरे ।

सरकारले शिक्षक महासंघसँग गरेको सम्झौताअनुसार शिक्षा विधेयकलाई समेत अगाडि नबढाएको आरोप पनि उनले लगाएका छन् ।

‘निजामती विधेयकमा एक किसिमको उदासीनता र भूमि विधेयकमा चाहिन् छिटो पारित गराउन हतारो किन भएको सरकारलाई ?,’ सांसद घर्तीको प्रश्न छ, ‘प्रशासनिक संघीयतालाई कार्यान्वयन गराउनको लागि आवश्यक पर्ने निजामती ऐन हामीले अहिलेसम्म पनि पारित गराउन सकिरहेका छैनौँ । प्रदेश र स्थानीय तहमा कर्मचारी नहुँदा निजामती ऐन किन आउन सकेको छैन ? यस विषयमा म सरकारको ध्यानाकर्षण गराउन चाहन्छु ।’

शिक्षकहरू पुनः आन्दोलन गर्ने चेतावनी दिइरहेको उल्लेख गर्दै उनले विद्यालय शिक्षा विधेयकलाई अघि बढाउन सरकारको ध्यानाकर्षण गराए । उनले प्रशासनिक संघीयतालाई कार्यान्वयन गराउन आवश्यक पर्ने निजामती ऐन पारित गर्न नसक्दा प्रदेश र स्थानीय तहले कर्मचारीको अभाव झेलिरहेको जानकारी दिए ।

‘शिक्षक आन्दोलन भर्खरै सम्पन्न भएको छ । सरकारले सम्झौता समेत गरेको छ । यो सम्झौता अनुसार शिक्षा विधेयक कहिले आउने हो ?,’ उनले भने, ‘शिक्षकहरूले सरकारले आफूलाई धोका दिएको भन्दै पुनः आन्दोलित हुने अवस्था छ । यसको बारेमा सरकारले के सोचेको छ ।’