वीपीले शेखर कोइरालाका बुवालाई लेखेको पत्र पढेर फर्किए गृहमन्त्री लेखक

काठमाडौं– दुई दिनदेखि बिराटनगरमा रहेका गृहमन्त्री रमेश लेखक बुधबार बिहानै कोइराला निवासमा पुगेका थिए। 

तत्कालिन सभापति गिरिजाप्रसाद कोइरालाको प्यारो घर मानिने कोइराला निवास अहिले नेता शेखर कोइरालाको आगमनका कारण चर्चामा रहने गरेको छ। 

उक्त निवासमा पुगेका गृहमन्त्री लेखकले निवासको अवलोकन मात्र गरेनन्, एउटा पत्र पढेका थिए। 

त्यो पत्र थियो कांग्रेसका आदर्श नेता वीपीले भाई केशव कोइरालालाई लेखेको पत्र। 

केशव कांग्रेस नेता शेखरका बुवा हुन्। यसक्रममा लेखकले केशवपत्नी नोना कोइरालासहित गिरिजालाई पनि स्मरण गरेका थिए। 

‘गृहमन्त्री लेखकले बीपी कोइरालाले भाइ केशव कोइरालालाई लेख्नुभएको पत्र अध्ययन गर्नुका साथै ऐतिहासिक तस्बिरहरु ध्यानपूर्वक अवलोकन गर्नुभएको थियो’, उनीसँगै निवासमा पुगेका कांग्रेस नेताले बताए।

‘नेपालको प्रजातान्त्रिक आन्दोलनमा कोइराला निवासको अग्रणी भूमिका रहेको बताउँदै गृहमन्त्री लेखकले बीपी, गिरिजाप्रसाद, नोना कोइरालालगायतलाई स्मरणसमेत गर्नुभएको थियो’, ति नेताले भने।

कोइराला निवासको अवलोकनपछि कोशी प्रदशेस्तरीय सुरक्षा गोष्ठीको औपचारिक कार्यक्रमका लागि लेखक फर्किएका थिए।