आर्थिक अपराध अनुसन्धान गर्न प्रहरीमा बेग्लै महाशाखा गठन, एसएसपी होबिन्द्र बोगटी प्रमुख तोकिए

काठमाडौं- नेपाल प्रहरीले आर्थिक मामिलासँग सम्बन्धित मुद्दा हेर्न निम्ति आर्थिक अपराध अनुसन्धान महाशाखाको स्थापना गरेको छ ।

आर्थिक अपराध, विवादास्पद कारोबार एवं गैरकानूनी आर्थिक परिचालनको रफ्तार बढेपछि प्रहरीले उक्त महाशाखा स्थापना गरेको केन्द्रीय प्रहरी प्रवक्ता एसएसपी रमेश थापाले बताए ।

‘ठूला र जटिल किसिमका मुद्दाहरू हामीले हेर्दै आएका छौं, आर्थिक अपराधमा पनि त्यही नै भइरहेको छ’, उनले भने । आर्थिक अपराधको रफ्तार बढेपछि जिल्ला र इलाका प्रहरी कार्यालयहरुले त्यस्ता मुद्दा हेर्नका निम्ति अलग्गै अनुसन्धान अधिकृत तोक्दै आएका छन् । त्यस्ता मुद्दाको चाप काठमाडौं उपत्यकाबाहिर भन्दा उपत्यकामा बढी छ । उपत्यका केन्द्रित आर्थिक अपराध अनुसन्धान महाशाखाले उपत्यकाबाहिरका पनि उजुरी र घटनाको अनुसन्धान अधिकार दिने गरी ओएनएम गरिने केन्द्रीय प्रहरी प्रवक्ता थापा बताउँछन् ।

आर्थिक अपराध अनुसन्धान महाशाखाले काठमाडौंमा अलग्गै कार्यालय सञ्चालन गरेपछि पनि पीडितको सहजतालाई दृष्टिगत गर्दै उपत्यकाबाहिरका जिल्ला र इलाका प्रहरी कार्यालयमा पनि त्यस्ता उजुरी र जाहेरी लिने क्रम जारी रहने प्रहरीले जनाएको छ ।