फ्लडलाइटसहितको त्रिवि क्रिकेट रङ्गशाला निर्माणको बाधक बन्यो एउटा ‘रुख’, समस्या यस्तो छ

काठमाडौं– त्रिभुवन विश्वविद्यालयको क्रिकेट रङ्गशाला निर्माणमा प्याराफिट नै बदल्नुपर्नेगरी बाधक बनेको छ, एउटा रुख। 

फ्लडलाइटको समेत ठेक्का लागिसकेर निर्माणको काम भैरहेको रङ्गशाला यसै कारण समयमा नसकिने मात्र होइन, प्याराफिट नै बदल्नुपर्ने नियतीमा पुगेको छ।

‘डिभिजन बन कार्यालयले एउटा रुख काट्न अनुमति नदिँदा त्रिभुवन विश्वविद्यालय (टियु) क्रिकेट ग्राउन्डको प्याराफिट डिजाइन नै परिवर्तन गर्नुपरेको छ’ नेपाल क्रिकेट संघ (क्यान)का पदाधिकारीले बताएका छन्।

क्यानका अनुसार हाल त्यो रुख ग्राउन्डको प्याराफिटकै बीचमा परेको छ। 

ति अधिकारी भन्छन्,‘यदि अहिले नै त्यो रुख हटाइएन भने, खेल भइरहेका बेला ठूलो हुरीबतास चल्यो भने उक्त रुख सिधै मैदानमा ढल्ने सम्भावना छ। त्यसले प्याराफिटमा मात्रै क्षति गर्दैन, मानवीय क्षतिको समेत उच्च जोखिम रहन्छ।’

अब यस्तो जोखिमको जिम्मा कसले लिने? त्यसबेला क्रिकेट संघले? कि नेपाल सरकारले? कि बन डिभिजन कार्यालयले?

नेपालका रुख काट्ने विषयको कानुनले पनि यसमा समस्या आई परेको बताइएको छ।

सरकारले फ्लडलाइटसहित रङ्गशाला निर्माण समयमा सकेर यसै बर्ष हुने घरेलुलगायतका अन्तर्राष्ट्रिय प्रतियोगिता पनि राती हुनेगरी सञ्चालनमा ल्याउने दाबी गरेको थियो। यसैकारण पनि बिलम्ब हुने सम्भावना रहेको बताइन्छ। 

गत बर्ष यहि मैदानमा चलेको नेपाल प्रिमियर लिग (एनपीएल)को पहिलो संस्करणका कारण नेपाली क्रिकेटले अन्तर्राष्ट्रियस्तरमा व्यापक चर्चा पाएको थियो।