बाढी पहिरो पीडितलाई अस्थायी घर बनाउन पहिलो किस्ता वितरण

काठमाडौँ- काभ्रेपलाञ्चोकस्थित ९ पालिकाका २ हजार ८४९ बाढी पहिरो पीडित परिवारलाई अस्थायी आवास निर्माण गर्न पहिलो किस्ता रकम वितरण सुरु भएको छ ।

प्रमुख जिल्ला अधिकारी नेतृत्वको विपद् व्यवस्थापन समितिको बैठकले काभ्रेका १३ पालिकामध्ये ९ पालिकाका बाढी पहिरो पीडितलाई घर बनाउन पहिलो किस्ता २५ हजार रुपैयाँ वितरण गर्ने निर्णय गरेको हो ।

२५ हजार रुपैयाँका दरले वितरण गर्न २ हजार ८ सय ४९ बाढी पहिरो पीडित घरपरिवारका लागि ७ करोड १२ लाख २५ हजार रुपैयाँ निकासा भएको छ ।

जिल्ला प्रशासन अनुसार सबैभन्दा बढी नमोबुद्ध नगरपालिकामा ८ सय २४, पनौती नगरपालिकामा ६ सय ३४, रोशी गाउँपालिकामा ५ सय ४८, चौरी देउराली गाउँपालिकामा २ सय ८०, बेचानचोक गाउँपालिकामा २ सय ३९, मण्डनदेउपुर नगरपालिकामा १ सय ३३, पाँचखाल नगरपालिकामा ८८, धुलिखेल नगरपालिकामा ८६ र महाभारत गाउँपालिकामा १७ घर प्रभावितलाई उक्त रकम पठाइएको हो ।

पहिलो चरणमा १० पालिकाका लागि रकम आए पनि खानी खोला गाउँपालिकाले विपद् व्यवस्थापन समितिको बैठकबाट लाभग्राहीको लिस्ट पठाएपछि मात्र रकम पठाउने जिल्ला प्रशासन कार्यालय काभ्रेले जानकारी दिएको छ।

अस्थायी आवासका लागि बनेपा नगरपालिका, तेमाल र भुम्लु गाउँपालिकाले स्थानीय विपद् व्यवस्थापन समितिले गर्नुपर्ने निर्णय नगरी सिधै विवरण मात्रै भरेकाले अस्थायी आवासको पहिलो किस्ता बापतको रकम निकासा नभएको हो ।