भारत–पाकिस्तान युद्धले पार्ने प्रभावबारे नेपाल सरकार बेलैमा गम्भीर बनोस् : सांसद गौतम

काठमाडौं- सत्ता साझेदार नेपाली कांग्रेसले भारत–पाकिस्तान युद्धले पार्ने प्रभावबारे नेपाल सरकार समयमै गम्भीर बन्नुपर्ने बताएको छ ।

आज (बुधबार) प्रतिनिधि सभाको बैठकमा विशेष समय लिएर बोल्दै कांग्रेसका सांसद सञ्जयकुमार गौतमले यो विषयमा सरकारको ध्यानाकर्षण गरेका हुन् ।

‘भूराजनीतिक संवेदनशीलता र खुला सीमानाका कारणले गर्दा भारत–पाकिस्तानबीचमा जुन युद्ध सुरु भएको छ यसले हामीलाई पार्ने अल्पकालीन र दीर्घकालीन दुवै किसिमका प्रभावहरूको विषयमा नेपाल सरकार समयमै गम्भीर बनोस्’, सांसद गौतमले भने । सरकारले बेलैमा ख्याल गर्न आवश्यक रहेको उनको भनाइ छ । उनले भने, ‘नेपाल सरकारले समयमै यस (भारत–पाकिस्तान युद्धले नेपाललाई पार्ने प्रभाव) मा छलफल अगाडि बढाओस् भन्ने आग्रह गर्न चाहन्छु ।’ राजनीतिक दलका शीर्ष नेताहरू पनि यो विषयमा गम्भीर हुन आवश्यक रहेको उनले बताए । राजनीतिक दलका बीचमा राष्ट्रिय विषयमा एकता हुन आवश्यक रहेकोमा उनले जोड दिए ।