झन्डै करोड हाराहारीको नगद जफतसहित गिरोह समात्न काठमाडौं प्रहरी कसरी भयो सफल?

काठमाडौं– जिल्ला प्रहरी परिसर काठमाडौंले झन्डै एक करोड अवैध रकमसहित एउटा गिरोहलाई समातेको छ। उक्त रकम हुन्डीको प्रयोजनका लागि ल्याइएको प्रारम्भिक चरणमा अनुमान गरिए पनि सुनको समेत हुन सक्ने आँकलन गरिएको छ।

प्रहरी बरिष्ठ उपरिक्षक (एसएसपी) विश्व अधिकारीले पाएको विशेष सूचनाका आधारमा हुन्डीको ९५ लाख १७ हजार पाँच सय रुपैयाँ बरामद गरिएको छ। 
सो रकमको ‘कनेक्सन’ खोजिरहेको एसएसपी अधिकारीले बताएका छन्। 

उनले भने, ‘प्रारम्भिक रुपमा हेर्दा सो रकम सुन किन्न वा हुन्डी गर्न ल्याइएको हुनसक्छ। यसबाहेक अपराधिक कामका लागि पनि हुनसक्ने सम्भावना रहन्छ। हामी यसको गहन अनुसन्धानमा जुटेका छौं। अहिले सबै कुरा भन्न सकिँदैन।’

दुईवटा मोटरसाइकलमा सवार उनहरूलाई शंकास्पद अवस्थामा देखेपछि प्रहरीले खानतलासी गरेको थियो।

पक्राउ पर्नेहरू काठमाडौंको तार्केश्वर नगरपालिका–३ फेदी घर भएका २९ वर्षीय समुन्द्र जमकट्टेल, सप्तरीको सप्तकोशी नगरपालिका–१ का ४३ वर्षीय गणेश राई, लमजुङको दोदी गाउँपालिका–३ का ३१ वर्षीय सन्तोष गुरुङ र लमजुङको दोदी गाउँपालिका–३ कै ३९ वर्षीय सन्तोष घिमिरे रहेका छन्।