इराक पुगेका चारजना नेपालीको मृत्यु

साउदी - वैदेशिक रोजगारीको क्रममा इराक पुगेका चार नेपालीको मृत्यु भएको छ। मृत्यु हुनेमा गोरखा बारपाक सुलिकोट-२ का निकेश गुरुङ, तेह्रथुमका टङ्कबहादुर फुम्बो, सिन्धुपाल्चोकका सञ्चमाई तामाङ र धादिङका भुवन गुरुङ रहेका छन्। 

उनीहरुको सडक दुर्घटना, हृदयघात र आत्महत्याका कारण इराकको बगदाद, कुर्दिस्तान र सुलेमानियामा मृत्यु भएको हो।

एनआरएन इराकका अध्यक्ष विनोद श्रेष्ठका अनुसार मृतक नेपालीको शव तत्काल नेपाल पठाउनको लागि सम्बन्धित निकायमा खबर गरिएको छ। पछिल्लो समयमा अवैधानिक रूपमा इराक पुगेका नेपालीहरूको मृत्यु हुने सङ्ख्या बढ्दो रहेको उनले बताए। साथै दुतावास नभएकोले गर्दा नेपाल शव पठाउन कठिन रहेको उनको भनाइ छ।

सरकारले इराक जानको लागि प्रतिबन्ध लगाए पनि गैरकानुनी बाटोबाट इराक जाने कामदारको संख्या धेरै छ। यस्तो अवस्थामा नेपालीहरू समस्यामा पर्दा एनआर एन सहयोग लागि सदैव तयार उनको भनाइ छ।

२०६१ साल भदौ ११ गते सुन्नी अतिवादी संगठन इस्लाम अल सुन्ना  समूहले १२ नेपालीको विभत्स हत्या गरेको थियो। त्यसपश्चात् नेपाल सरकारले इराक जानको लागि प्रतिबन्ध लगाएको थियो । पछिल्लो धेरै कमाई हुने प्रभोलनमा विशेष  गरि घरेलु कामदारको रूपमा गैर  कानुनी तरिकाले भारत हुँदै दुबईबाट इराकको कुर्दिस्तान , सुलेमानीया , बगदाद  सहरमा घरेलु कामदारको लागि नेपाली महिलाहरू पुग्ने गरेका छन्।

एजेन्टहरुले करिब ३ हजार देखि ७ हजार अमेरिकन डलरमा बेचबिखन गरि महिलाकामदारलाई  घरेलु काममा लगाउँदै आएको पाइन्छ।