काठमाडौँ- देशमा आर्थिक सुधारको आधार तयार हुँदै गरेको नेपाल उद्योग वाणिज्य महासंघका अध्यक्ष चन्द्र प्रसाद ढकालले बताएका छन् ।
सोमबार महासंघको सचिवालय टेकुमा अन्तर्राष्ट्रिय वित्त निगमका दक्षिण एसियाका क्षेत्रीय निर्देशक इमाद फाखौरीसँगको भेटघाटका क्रममा ढकालले आर्थिक सुधारका लागि ठोस पहलहरू भएको बताएका हुन् । सरकारले नेपाल उद्योग वाणिज्य महासंघले दिएको सुझावलाई मनन गरेको र नयाँ पुस्ताका सुधारहरू अघि बढाएको पनि उनले जानकारी दिए । ढकालले सरकार, निजी क्षेत्र र अन्तर्राष्ट्रिय विकास साझेदारहरूले हाते मालो गरेर आर्थिक वृद्धिलाई प्रवर्द्धन गर्न सकिने बताए ।स्वदेशी उत्पादन बढाएर आन्तरिक र अन्तर्राष्ट्रिय बजारमा व्यवसायहरूको प्रतिस्पर्धात्मकता सुधार्न मिलेर काम गर्नुपर्ने पनि ढकालको भनाइ थियो । महासंघ र अन्तर्राष्ट्रिय वित्त निगमले संयुक्त रूपमा प्रकाशित गरेको ‘नेपालमा निजी क्षेत्रको अवस्था’ शीर्षकको प्रतिवेदनको सहकार्यबारे पनि ढकालले जानकारी गराएका थिए । ढकालले उक्त प्रतिवेदन व्यावसायिक समुदाय र नीतिनिर्माताका लागि महत्त्वपूर्ण साबित भएको दाबी गरे ।
ढकालले नेपाल उद्योग वाणिज्य महासंघ अन्तर्राष्ट्रिय वित्त निगम नेपाल टोलीसँग मिलेर निजी क्षेत्रमा वातावरणीय, सामाजिक र सुशासनमा (ईएसजी) कार्यक्रम ल्याउन कार्यरत रहेको पनि बताए । ढकालले अन्तर्राष्ट्रिय वित्त निगमको विशेषज्ञता र महासंघको स्थानीय व्यवसाय समुदायसँगको सशक्त सम्बन्धले नेपालको आर्थिक परिदृश्यमा परिवर्तन ल्याउन महत्त्वपूर्ण प्रगति गर्न सकिने विश्वास व्यक्त गरे ।
भेटका क्रममा फाखौरीले सार्वजनिक-निजी साझेदारीहरूमा थप जोड दिन आवश्यक रहेको बताए । फाखौरीले यसै समयमा नेपालले केही आर्थिक चुनौतीहरूको सामना गरिरहेको भए पनि देशका लागि धेरै अवसरहरू पनि रहेको उनको भनाइ थियो ।
