सुन तस्करीको कनेक्सन माओवादी नेता र कार्यकर्ताको वरपर, तर अनुसन्धान भएन

काठमाडाैं- राजश्व अनुसन्धान विभागले बरामद गरेर सुरु गरेको सुन तस्करी प्रकरणको अनुसन्धानको जिम्मेवारी सरकारले नेपाल प्रहरीको केन्द्रीय अनुसन्धान ब्यूरो (सिआईबी) दियो।

यसको प्रमुख प्रतिपक्ष दल नेकपा एमालेले तीव्र विरोध जनायो र करिब १ महिना बढी संसद् पनि अवरुद्ध गर्‍यो।

तर सरकार आफ्नो निर्णयमा टसमस भएन। अनुसन्धानको जिम्मेवारी सिआइबीलाई नै दिएर छाड्यो। यसबिचमा सिआइबीले बढे तामझामका साथ अनुसन्धान गरिरह्र्यो। आफ्ना केही अनुसन्धान अधिकृतलाई भारत पठायो त केहीलाई चीन पनि पठायो। तर कतैबाट पनि अपेक्षाकृत सहयोग पाएन। सहयोग नपाएको अनौपचारिक जानकारी भने दिइरह्यो।

सुन तस्करीमा तस्करहरूले प्रयोग गरेका संवादका माध्यम वि च्याट र ह्वाटस्एप जस्ता सामाजिक सञ्जालका सञ्चालकहरूले सूचना प्रवाहमा सहयोग नगरेको गुनासो पनि सिआइबीले गरिरह्यो।

अनुसन्धानका क्रममा सिआइबीले सुन तस्करीको घटना माओवादीका केही नेता र कार्यकर्ता वरपर घुमिरहेको सङ्केत देखा परेको तर पुष्टि गर्न नसकेको बताउँदै आएको थियो। सिआइबी स्रोतले यसअघि माओवादी नेता र कार्यकर्ता गरी ६० जना यस प्रकरणमा जोडिएको पाइएको जानकारी दिएको थियो।

यसैबिच सिआइबीले आफ्नो अनुसन्धान सकेर बुधवार सरकारी वकिलको कार्यालयमा आफ्नो प्रतिवेदन पनि बुझायो। सिआइबीका अघिल्ला अनुसन्धान र बिचबिचमा आएका सूचनाले यस पटक भने सुन तस्करीका ठुला नाइके नै पक्राउ पर्छन् की भन्ने आम नागरिकमा आशा पलाएको थियो।

तर जब प्रतिवेदन तयार गरियो त्यसमा सुरुमा भनिए जस्तो कुनै ठुलो तस्करको नाम आएन। माओवादीका नेता र कार्यकर्ताको नाम पनि कतै देखिएन। तस्करीको प्रमुख भूमिकामा बेल्जियन नागरिक छिरिङ र चिनियाँ नागरिकहरूलाई प्रस्तुत गरियो। स–सानो भूमिकामा नेपाली नागरिक संलग्न भएको तथ्य खोजेर प्रतिवादीहरू तयार गरियो।

तर सिआइबीले आफ्नो प्रतिवेदनमा एउटा ठुलो सङ्केत दिएको छ। काठमाडौं ठमेलको होटेल भियनाका सञ्चालक दावा छिरिङ जो आफू बेल्जियन नागरिक हुन। प्रतिवेदनमा यिनलाई नै सुन तस्करीको मूल बिचौलिया बनाइएको छ। तर उनीहरूसँग जोडिएका माओवादी केन्द्रका उच्च नेताहरूबारे भने केही पनि खुलाइएको छैन।

तीनै बेल्जियन नागरिक दावा छिरिङसँग बिहे गरेकी माओवादी केन्द्रनिकट अमल रोकालाई भने प्रतिवादी बनाइएको छ। उनी फरार छिन्।  ‘यो अनुसन्धान निरन्तर जारी रहने भएकाले निकट दिनमा राजनीतिक व्यक्तिहरूको संलग्नता देखिए अवश्य पनि छानबिन हुनेछ,’ सिआइबी प्रमुख एआइजी किरण बज्राचार्यले भनिन्। यो समाचार आजको नागरिक दैनिकमा प्रकाशित छ।