प्रधानमन्त्री प्रचण्डको स्पष्टोक्ति– वाम एकता गर्दैमा कांग्रेससँगको सम्बन्ध टुट्ने छैन 

काठमाडौँ– प्रधानमन्त्री पुष्पकमल दाहाल प्रचण्डले कम्युनिस्टहरूको एकताले आफ्नो पार्टी नेकपा (माओवादी केन्द्र)को नेपाली कांग्रेससँगको सम्बन्ध नटुट्ने स्पष्ट पारेका छन् ।

गिरिजाप्रसाद कोइरालाको जन्मशताब्दीको अवसरमा चाबहिलस्थित जिपी कोइराला मेमोरियल कलेजले आज आयोजना गरेको एक कार्यक्रमलाई सम्बोधन गर्दै उनले वाम एकताले कांग्रेस तरंगित हुनुनपर्ने बताए ।

कम्युनिष्टहरुबीच एकता भए पनि कांग्रेससँगको सम्बन्ध नटुट्ने दाबी गर्दै उनले भने, ‘मैले लेफ्टहरूको युनिटीको कुरा गर्दा कांग्रेससँग डिसयुनिटी हुनेछैन ।’

विगतका राजनीतिक आन्दोलनमा कांग्रेस र कम्युनिस्ट मिलेर लडेकाले हालसम्मको उपलब्धि हासिल भएको भन्दै उनले कम्युनिस्ट एकताको कुराबाट कांग्रेस तरंगित हुन नपर्ने बताएका हुन् । अर्को प्रश.गमा प्रधानमन्त्री प्रचण्डले सुशासन, न्याय र समृद्धिका शान्तिपूर्ण क्रान्तिको आवश्यकता रहेको धारणा राखे ।

उनले मुलुकका देखिएको बेथिति, अराजकता र लोकतन्त्रमाथि देखिएको खतराको अन्त्य सामान्य सुधारबाट सम्भव नहुने भनाइ व्यक्त गरे । 

‘लोकतन्त्रमाथि खतराको घन्टी बजिरहेको समयमा लामो इतिहास भएका राजनीतिक दलप्रति जनताको भरोसा र विश्वास जगाउन आवश्यक छ । यसका लागि नेपाली कांग्रेससँग सहकार्य आवश्यक ठानेरै म यो गठबन्धनलाई बलियो बनाउन लागेको हुँ,’ उनले भने ।