काठमाडौँ– भारतमा हुने साफ च्याम्पियनसिप फुटबल प्रतियोगिताका लागि नेपाली राष्ट्रिय फुटबल टोलीको घोषणा भएको छ ।
मुख्य प्रशिक्षक भिन्चेन्सो अल्बर्टो एनेसले बिहीबार प्रतियोगिताका लागि २३ सदस्यीय टोली घोषणा गरेका हुन् ।
विमल पाण्डे, सीमान्त थापा, निशान्त खड्का, लकेन लिम्बू र आभाष लामिछानेले पहिलो पटक टोलीमा स्थान पाएका छन् ।
दिनेश हेन्जन, जिलेस्पीजंग कार्की, सुदीप गुरुङ, अन्जल महर्जन, आशिष गुरुङ, विक्रम लामा र विशाल तामाङले पनि टोलीमा स्थान बनाउन सकेनन् ।
गोलकिपरमा किरण चेम्जोङ, दीप कार्की, विशाल श्रेष्ठ रहेका छन् भने डिफेन्डरमा विमल पाण्डे, सनिश श्रेष्ठ, अनन्त तामाङ, देवेन्द्र तामाङ, निशान्त खड्का, रोहित चन्द, सीमान्त थापा रहेका छन् ।
त्यस्तै मिडफिल्डर पुजन उपरकोटी, एरिक विष्ट, नवीन लामा, मणिकुमार लामा, लाकेन लिम्बू, आभाष लामिछाने रहेका छन् ।
त्यसैगरी फरवार्डमा आयुष घलान, नवयुग श्रेष्ठ, दीपकराज सिंह ठकुरी, अञ्जन विष्ट, मनीष डाँगी, आशिष चौधरी र विमल घर्तीमगर रहेका छन् ।
जुन २१ देखि जुलाई ४ सम्म सञ्चालन हुने प्रतियोगितामा नेपाल समूह ‘ए’मा छ। यो समूहमा नेपालसँगै घरेलु टोली भारत, पाकिस्तान र कुवेत छन् । आठ टोलीको सहभागिता रहने प्रतियोगिताको समूह ‘बी’मा लेबनान, माल्दिभ्स, भुटान र बंगलादेश छन् ।
