काठमाडौँ– साविक विजेता गुजरात टाइटन्सलाई हराउँदै चेन्नाई सुपर किंग्स पाँचौ पल्ट भारतमा भएको १६ औँ संस्करणको इन्डियन प्रिमियर लिग (आइपिएल) २०२३ को उपाधि जितेको छ ।
गएराति गुजरातको अहमदाबादमा सम्पन्न फाइनलमा गुजरातलाई डकवर्थ लेविस पद्धतिको आधारमा ५ विकेटले पराजित गर्दै चेन्नाईले पाँचौ उपाधि जितेको हो । योसँगै चेन्नाईले मुम्बई इन्डियन्सले सर्वाधिक पाँच पटक उपाधि जितेर बनाएको कीर्तिमान बराबरी गरेको छ ।
चेन्नाई पाँचौ पल्ट नै फाइनलमा पुगेको छ । यता मुम्बई भने एक पटक फाइनलमा पराजित भएको छ । यसरी हेर्दा समग्र नतिजामा चेन्नाईले मुम्बईलाई उछिनेको छ ।
घरेलु टोली गुजरातले दिएको २१५ रनको लक्ष्य पछ्याएको चेन्नाईले ब्याटिङ गरेकोमा पहिलो ओभरमा भारी वर्षा भएपछि खेल रोकिएको थियो । लामो समय रोकिएको खेल ५ ओभर घटाएर सुरु गरिएको थियो ।
नयाँ १७१ रनको लक्ष्य चेन्नईले निर्धारित १५ ओभरमा ५ विकेट गुमाउँदै पूरा गर्यो ।
चेन्नईका लागि डेभोन कन्वेले २५ बलमा ४ चौका र २ छक्काको सहयोगमा सर्वाधिक ४७ रन बनाए । चेन्नईलाई जितको लागि अन्तिम २ बलमा १० रन चाहिँदा रवीन्द्र जडेजाले छक्का र चौका हान्दै खेल जिताएका थिए ।
चेन्नईका शिवम दुबे २१ बलमा २ छक्कासहित ३२ रनमा अविजितत रहे । जडेजा ६ बलमा १ चौका र १ छक्कासहित १५ रनमा अविजित रहे ।
चेन्नाईलाई उपाधि जित्न ओभरमा १३ रन चाहिँएको थियो । बलिङमा मोहित शर्मा आउँदा क्रिजमा दुवे र जडेजा रहेका थिए । मोहित शर्माले पहिलो बल दुवेलाई डट राखे ।
दोस्रो बलमा एक रन बटुलेपछि ४ बलमा १२ रन चाहिँएको थियो । तेस्रो बलमा जडेजाले पनि एक रन नै बटुले । चौथो बलमा पनि एक रन नै दिएपछि उपाधि कठिन बनेको थियो ।
पाँचौं बलमा जडेजाले छक्का हानेपछि खेल रोचक बनेको थियो । अन्तिम बलमा जितको लागि ४ रन चाहिँएको थियो । अन्तिम बलमा जडेजाले नै चौका हान्दै उपाधि पक्का गराएका हुन् ।
चेन्नईलाई ओपनर ऋतुराज गायकवाड र डेभन कन्वेले ३९ बलमा ७४ रन जोड्दै उत्कृष्ट सुरुवात गरेका थिए । गायकवाड १६ बलमा ३ चौका र १ छक्कासहित २६ रनमा आउट भए ।
यस्तै, अजिक्य राहाणे १३ बलमा २ चौका र २ छक्कासहित महत्वपूर्ण २७ रन जोड्दै आउट भए । उनी मोहित शर्माको बलमा विजय शंकरबाट क्याच आउट भए ।
अम्बाती रायुडू ८ बलमा १ चौका र २ छक्कासहित १९ रनमा आउट भए । उनले आफ्नो आइपिएलको अन्तिम खेल खेलेका थिए ।
त्यसअघि टस हारेर पहिले ब्याटिङ गरेको गुजरातले निर्धारित २० ओभरमा ४ विकेट गुमाएर २१४ रन बनायो ।
गुजरातका लागि साई शुदर्शन र ऋद्धिमान शाहले अर्धशतकीय पारी खेले । शुदर्शनले ४७ बलमा ८ चौका र ६ छक्काको सहयोगमा ९६ रन बनाए । शाहले ३९ बलमा ५ चौका र १ छक्काको सहयोगमा ५४ रन जोडे ।
पहिलो विकेटका लागि ओपनरद्वय शाह र शुभमन गिलले ४२ बलमा ६७ रनको साझेदारी गरे । पछिल्लो चार खेलमा ३ शतक बनाएका गिलले २० बलमा ७ चौकाको सहयोगमा ३९ रन बनाए ।
दोस्रो विकेटका लागि शाह र शुदर्शनले ६४ रनको साझेदारी गरे ।
कप्तान हार्दिक पान्ड्याले बलमा चौका र छक्काको सहयोगमा अविजित रन बनाए । राशिद खान शून्य रनमा आउट भए ।
चेन्नईका लागि मथिशा पथिरानाले २ तथा दीपक चहर र रवीन्द्र जडेजाले समान १-१ विकेट लिए ।
१० टोली सहभागी लिग चरणमा गुजरात शीर्ष र चेन्नाई दोस्रो स्थानमा रहँदै सिधै क्वालिफायरमा स्थान बनाएका थिए । पहिलो क्वालिफायरमा चेन्नाईले गुजरातलाई हराउँदै फाइनलमा स्थान बनाएको थियो । गुजरातले दोस्रो क्वालिफायरमा मुम्बईलाई हराउँदै फाइनलमा स्थान बनाएको हो ।
