काठमाडौँ– जितसँगै रोयल च्यालेन्जर्स बेंग्लोरले भारतमा जारी १६ औँ संस्करणको इन्डियन प्रिमियर लिग (आइपिएल) क्रिकेटमा प्ले अफमा पुग्ने सम्भावना बलियो बनाएको छ ।
बैंग्लोरले गएराति सनराइजर्स हैदराबादलाई ८ विकेटको फराकिलो अन्तरले हराएको हो ।
जितसँगै बेंग्लोर १३ खेलमा ७ मा जित र ६ मा हारसहित १४ अंकका साथ चौथो स्थानमा उक्लिएको छ । बेंग्लोरले आइतबार गुजरातसँग खेल्नेछ । उक्त खेलमा बेंग्लोर विजयी हुँदा १६ अंकमा पुग्नेछ । यस्तोमा रनरेटले अघि रहेको बेंग्लोर प्ले अफमा पुग्नेछ ।
प्ले अफको दौडबाट बाहिरिसकेको हैदराबाद १३ खेलमा ४ जित र ७ हारका साथ पुछारमा रहेको छ ।
राजीव गान्धी क्रिकेट रंगशालामा घरेलु टोली हैदराबादले दिएको १८७ रनको लक्ष्य बेंग्लोरले १९ दशमलब २ ओभरमा २ विकेट गुमाउँदै पूरा गर्यो ।
ओपनर विराट कोहलीको शतक बनाए । उनले ६३ बलमा १२ चौका र ४ छक्कासहित १०० रनको शतकीय पारी खेले । कोहलीको यो आइपिएल करिअरको छैटौं शतक हो ।
पहिलो विकेटका लागि कोहली र कप्तान फाफ डू प्लेसिसले १०७ बलमा १७२ रनको साझेदारी गर्दै जितको आधार तय गरेका थिए ।
कप्तान डू प्लेसिस ४७ बलमा ७ चौका र २ छक्कासहित ७१ रनको अर्धशतकीय पारी खेले । ग्लेन म्याक्सवेल ५ र माइकल बेसवेल ४ रनमा अविजित रहे ।
हैदराबादका लागि टी नटराजन र भुवनेश्वर कुमारले समान १÷१ विकेट लिए पनि त्यो जितका लागि पर्याप्त भएन ।
त्यसअघि टस हारेर पहिला ब्याटिङको गरेको हैदराबादले निर्धारित २० ओभरमा ५ विकेट गुमाउँदै १८६ रन बनाएको थियो ।
हैदराबादका लागि विकेटकिपर हेनरिच क्लासेनले ५१ बलमा ८ चौका र ६ छक्कासहित १०४ रनको उत्कृष्ट शतकीय पारी खेलेका थिए ।
आइपिएल करिअरको पहिलो शतक क्लासेनले ४९ बलमा पूरा गरेका थिए ।
कप्तान एडेन माक्ररम र क्लासेनले तेस्रो विकेटका लागि ५० बलमा ७६ रनको साझेदारी गरेका थिए । माक्ररम २० बलमा १८ रनमा आउट भए ।
चौथो विकेटका लागि ह्यारी ब्रुक र क्लासेनले ३६ बलमा ७४ रनको साझेदारी गरेका थिए । ब्रुक १७ बलमा २ चौका र १ छक्कासहित २७ रनमा अविजित रहेका थिए ।
ओपनरद्वय अभिषेक शर्मा ११ र राहुल त्रिपाठी १५ रनमा आउट भएका थिए । दुबै ओपनर स्पिनर माइकल ब्रेसवेलले एकै ओभरमा आउट गराएका थिए ।
बेंग्लोरका माइकल ब्रेसवेले सर्वाीधक २ तथा मोहम्मद शिराज, हर्षल पटेल र शहबाज अहमदले समान १÷१ विकेट लिए ।
