काठमाडौँ– दिल्ली क्यापिटल्ससँग पराजित भएपछि पञ्जाब किंग्स भारतमा जारी इन्डियन प्रिमियर लिग (आइपिएल)को समूह चरणबाट नै बाहिरिने सम्भावना बलियो बनेको छ ।
गएराति धर्मशालामा रहेको एचपिसिए मैदानमा भएको खेलमा दिल्लीसँग १५ रनले पराजित हुँदै पञ्जाब प्रतियोगिताबाट बाहिरिने संघारमा पुगेको हो ।
दिल्लीले दिएको २१४ रनको लक्ष्य पछ्याएको पञ्जाबले निर्धारित २० ओभरमा ८ विकेट गुमाएर १९८ रन मात्र बनायो ।
पञ्जाबका लागि लियम लिविङ्स्टोन र अर्थव ताईटेले अर्धशतकीय जारी खेले पनि टोलीलाई जिताउन सकेनन् ।
लिविङ्स्टोनले ४८ बलमा ५ चौका र ९ छक्काको सहयोगमा ९४ रनको विष्फोटक पारी खेले । ताइडे ४२ बलमा ५ चौका र २ छक्काको सहयोगमा ५५ रन बनाउँदै आउट भए ।
दिल्लीका लागि एनरिच नोर्किया र इशान्त शर्माले समान २-२ तथा खलिल अहमद र अक्षर पटेलले समान १-१ विकेट लिए ।
त्यसअघि टस हारेर पहिला ब्याटिङ गरेको दिल्लीले निर्धारित २० ओभरमा २ विकेट गुमाउँदै २१३ रन बनाएको थियो ।
दिल्लीका लागि राइली रोसोऊ र पृथ्वी शाले अर्धशतकीय पारी खेले । रोसोऊले ३७ बलमा ६ चौका र ६ छक्कासहित अविजित ८२ रनमा बनाए ।
दिल्लीका लागि उत्कृष्ट सुरुआत दिने क्रममा ओपनरद्वय पृथ्वी शा र डेविड वार्नरले पहिलो विकेटका लागि ६२ बलमा ९४ रनको साझेदारी गरेका थिए । साम करनको बलमा शिखर धवनबाट क्याच आउट हुनु अघि वार्नरले ३१ बलमा ५ चौका र २ छक्का सहयोगमा ४६ रन बनाएका थिए ।
प्ले अफ दौडबाट बाहिरिइसकेको दिल्लीलाई शालाई खेलमा मौका दिएको थियो । शा ३८ बलमा ७ चौका र १ छक्कासहित ५४ रनमा आउट भए । दोस्रो विकेटका लागि रोसोऊ र शाको बीचमा २८ बलमा ५४ रनको महत्वपूर्ण साझेदारी भएको थियो ।
तेस्रो विकेटका लागि फिलिप साल्ट र रोसोउले ३० बलमा अविजित ६५ रनको साझेदारी गरेका थिए । साल्ट १४ बलमा २ चौका र २ छक्काको सहयोगमा २६ रनमा अविजित रहेका थिए ।
पञ्जाबका साम करनले सर्वाधिक २ विकेट लिए ।
जितसँगै प्ले अफ दौडबाट बाहिरिसकेको दिल्ली १३ खेलबाट १० अंकका साथ नवौं स्थानमा रहेको छ ।
हारसँगै प्ले अफ सम्भावना कठिन भएको पञ्जाब १३ खेलबाट १२ अंकका साथ आठौं स्थानमा झरेको छ । अब पञ्जाब प्ले अफमा पुग्न राजस्थान रोयल्सलाई फराकिलो अन्तरले हराएर मात्र पुग्दैन अरु टोलीले पनि फराकिलो अन्तरले हार्नु पर्छ ।
