प्रत्येक वर्ष वैशाख शुक्ल पूर्णिमाका दिन किरात राई समुदायले मनाउने उभौली पर्व शुक्रबार देशभर मनाइएका् छ । किरात राईहरूले नयाँ बानेश्वरमा कोशी प्रदेश खारेजीको मागसहित यो पर्व मनाएका हुन् ।
उनीहरूले कोशी प्रदेशको नाम खारेजीको मागसहित विभिन्न ब्यानर बोकेका थिए । बाली लगाउनुअघि गाउँगाउँमा रहेका भूमेस्थानमा राम्रोसँग काम होस् भनी प्रकृतिको पूजा आराधना गरिने परम्परा यस पर्वमा छ ।
वैशाख शुक्ल पूर्णिमादेखि चराचुरुङ्गीलगायत जङ्गली जनावर पनि उँभो लाग्ने किराँत समुदायको विश्वास छ । उभौली पर्वमा किराँत समुदायका पनि विभिन्न सम्प्रदायका बीच साकेला नाच पनि नाचिन्छ ।
विभिन्न संस्था र प्रदेश १ को पुनः नामकरण संयुक्त संघर्ष समितिले प्रदेश १ को नाम पहिचानको आधारमा हुनेपर्ने मागसहित यस वर्षको उभौली/साकेला, यक्वा तङ्नाम, श्याँदर पिदर, युच्याङ, चासुवा, भुम्या, भुमे लगायतले सडकमै पर्व मनाएका हुन् । जातीय संस्कृति झल्काउने र सांगीतिक कार्यक्रम गरेर सरकारलाई दबाब दिन कोसी प्रदेश खारेजसहितको प्लेकार्ड पनि प्रदर्शन गरिएको थियो ।
