काठमाडौँ– माउ पार्टी नेपाली कांग्रेसको कार्यसम्पादन समितिको बैठक बस्नैलाग्दा भ्रातृ संगठन नेपाल विद्यार्थीका संघका असन्तुष्ट पक्षले पार्टी केन्द्रीय कार्यालय सानेपाअगाडि नारबाजी गरेका छन् ।

नेविसंघका सभापति दुजाङ शेर्पालाई बर्खास्त गर्न माग गर्दै जारी अनसनको समर्थनमा नाराबाजी भएको हो ।

पार्टी कार्यालय परिसरमा नाराबाजी गर्दै नेताहरूलाई पार्टी कार्यालय प्रवेशमा अवरोध गरेपछि त्यहाँको सुरक्षा व्यवस्था कडा पारिएको छ ।

सभापति शेर्पाविरुद्ध पहिलो दिन निश्चल महर्जन र अंशुल केसी अनशनमा बसेका थिए । आज दोस्रो दिन अमन भुसाल (रुपन्देही) र राजेन्द्र चटौत (कैलाली) अनशनमा बसेका छन् । 

सत्तारुढ घटक कांग्रेसले कार्यसम्पादनको बैठक १० बजेपछिदेखि पार्टीको केन्द्रीय कार्यालय सानेपामा बसिरहेको छ । 

बैठकमा केन्द्रीय कार्यसम्पादन समितिका पदाधिकारी एवं सदस्यहरूको उपस्थितिका लागि निर्देशानुसार अनुरोध गरिएको छ ।

डा शेखर कोइराला समूह असन्तुष्ट भएपछि आफूले पाएका ८ मध्ये ४ मन्त्रालयमा मन्त्री छान्न बाँकी छ । आज सो विषय तथा उपनिर्वाचनबारे छलफल हुने बताइएको छ ।