बैतडीका २ क्याम्पसमा स्ववियु निर्वाचन अनिश्चित

बैतडी –त्रिभुवन विश्वविद्यालयबाट सम्बन्धन प्राप्त बैतडीका दुई क्याम्पसमा स्वतन्त्र विद्यार्थी युनियन (स्ववियु) निर्वाचन अनिश्चित भएको छ । सिगास शिक्षा क्याम्पस, गाँजरी र बैतडी शिक्षा क्याम्पस, शाहीलेकमा स्ववियु निर्वाचन अनिश्चित भएको हो ।

त्रिविले चैत ५ गते निर्वाचनको मिति तोके पनि विवादका कारण निर्वाचन हुन सकेन । यी दुई क्याम्पसमा मनोनयन दर्ता भए पनि विद्यार्थी संगठनबीचको विवादले स्ववियु निर्वाचन स्थगित भएको थियो । यी दुई क्याम्पसमा कहिले निर्वाचन हुने भन्ने टुंगो लागेको छैन ।

अन्तिम समयसम्म पनि विद्यार्थी संगठनबीच छलफल गरिए पनि सहमति हुन नसक्दा निर्वाचन स्थगित भएको बैतडी शिक्षा क्याम्पसका प्रमुख हर्क चन्दले जानकारी दिए । अब नयाँ निर्वाचन कहिले हुने भन्ने टुंगो लगालेको चन्दको भनाइ छ । श्रीकोट बहुमुखी क्याम्पस, पुर्चौडी बहुमुखी क्याम्पस, नवप्रभात संयुक्त क्याम्पस र सेटीगाउँ बहुमुखी क्याम्पसमा भने आइतबार निर्वाचन भइसकेको छ ।