काठमाडौँ– नेपालले आज युएईविरुद्ध आइसिसी क्रिकेट विश्वकप लिग– २ को महत्वपूर्ण खेल खेल्दैछ ।
यो खेल कीर्तिपुरस्थित त्रिवि क्रिकेट मैदानमा बिहान ९ः३० बाट सुरु हुनेछ ।
यसैबीच, नेपालका कप्तान रोहितकुमार पौडेलले टस जितेर ब्याटिङ गर्ने निर्णय गरेका छन् । यस्तै आज नेपालले सुरुवाती ११ मा दुई परिवर्तन गरेको छ ।
पूर्वकप्तान ज्ञानेन्द्र मल्ल र करण केसीलाई बेन्चमा राखेको छ । उनीहरूको स्थानमा ललितनारायण राजवंशी र गुलशन झालाई खेलाइने भएको छ ।
घरेलु टोली नेपाल आज युएईलाई हराउँदै कम्तीमा एकदिवसीय (ओडिआई) मान्यता जोगाउने सुरमा हुनेछ ।
नेपाल अंक तालिकामा नेपाल पाँचौँ स्थानमा छ । नेपालले ३३ खेलमा ३४ अंक जोडेको छ ।
अमेरिका ३६ खेलमा १६ मा जित र १७ मा हारसहित ३५ अंकका साथ चौथो स्थानमा छ ।
नेपालले यदि युएईलाई हराउँदा ३६ अंकका साथ चौथो स्थानमा उक्लनेछ । बाँकी दुवै खेलमा पराजित भए पनि नेपाल शीर्ष पाँचमा रहने छ ।
यस्तोमा नेपालको ओडिआई मान्यता बच्नेछ ।
अर्कोतिर, लिगको शीर्ष तीनमा रहेमा नेपाल ओडिआई विश्वकपको छनोटमा जीवितै रहनेछ । यसर्थ, नेपालका लागि आजको खेल धेरै महत्वपूर्ण छ ।
युएई भने ३३ खेलमा १४ मा जित र १६ मा हारसहित ३१ अंकका साथ छैटौं स्थानमा छ । आज पराजित भए उसले ओडिआई मान्यता गुमाउने छ ।
