जकार्ता– इन्डोनेसियाको पश्चिमी प्रान्त नाटुना रिजेन्सीमा गएको पहिरोमा परी मृत्यु हुनेको संख्या ३६ पुगेको छ ।
विपद् न्यूनीकरण निकाय (बिएनपिबी)का प्रवक्ता अब्दुल मुहारीले पहिरोमा परी मृत्यु हुनेको संख्या शनिबार ३६ पुगेको जानकारी दिएका हुन् ।
‘पहिरोमा पुरिएका ३६ जनाको शव निकालिएको छ । यसबीचमा हराइरहेका १८ जनाको खोजी कार्य जारी छ,’ मुहारीले जारी गरेको विज्ञप्तिमा भनिएको छ ।
लगातारको भारी वर्षाका कारण सोमबार दिउँसो पहिरो खसेको हो । पहिरोपछि तीन वटा गाउँ पुरिएको र एक हजारभन्दा बढी मानिसले अस्थायी आश्रय लिएका बताइएको छ । इन्डोनेसियामा सामान्यतया वर्षायाममा ठुलो बाढी र पहिरोजस्ता थुप्रै जल उत्पन्न प्रकोपहरू हुन्छन् ।
प्रकाशित मिति: आइतबार, फागुन २८, २०७९ ०५:३९
प्रतिक्रिया दिनुहोस्
