काठमाडौँ– नेपाली कांग्रेसका सभापति तथा संसदीय दलका नेता शेरबहादुर देउवालाई विपक्षी दलको नेताको सुविधा नदिन माग गर्दै सर्वोच्च अदालतमा रिट निवेदन दर्ता भएको छ ।

यसअघिको दरपिठको आदेश बदर गरी सर्वोच्च अदालतले रिट निवेदन दर्ता गरेको हो ।

सर्वोच्च अदालतकी न्यायाधीश सपना मल्ल प्रधानले दरपिठको आदेश बदर गरी उक्त रिट निवेदन दर्ता गर्न आदेश दिएकी थिइन् । सो आदेशसँगै रिट दर्ता भएको छ । उक्त रिटमाथि सुनुवाइका लागि बुधबार पेसी तोकिएको छ । 

अधिवक्ता विमलप्रसाद पोखरेलले देउवालाई विपक्षी दलको नेताको सुविधा उपलब्ध नगराउन माग गर्दै संघीय संसद् सचिवालयविरुद्ध रिट दर्ता गरेका हुन् । सरकारलाई समर्थन गर्न दल विपक्षी हुन नसक्ने जिकिरसहित अधिवक्ता पोखरेलले देउवालाई विपक्षी दलको नेताको सुविधा उपलब्ध नगराउन माग गरेका हुन् ।

प्रधानमन्त्री पुष्पकमल दाहाल प्रचण्डले प्रतिनिधिसभाबाट विश्वासको मत लिँदा कांग्रेसले पनि विश्वासको मत दिएको थियो । 

प्रधानमन्त्रीलाई विश्वासको मत दिएको दल प्रमुख विपक्षी दल हुन नसक्ने जिकिर निवेदनमा गरिएको छ ।