पोखरा–वैकल्पिक खेलाडी सुदिल रार्ईको गोलमा त्रिभुवन आर्मी क्लबले मंगलबार गण्डकी प्रदेशलाई १–० ले हराउँदै नवौँ राष्ट्रिय खेलकुद प्रतियोगितामा पुरुष फुटबलको फाइनलमा स्थान बनाएको छ । पोखरा रंगशालामा त्रिभुवन आर्मीले ५८ औँ मिनेटमा सुदिलले गोलबाट अग्रता लिएको थियो । सुदिलको त्यही गोल आर्मीको जितमा निर्णायक बन्यो । सुदिल २४ औँ मिनेटमा कप्तान भरत खवासको स्थानमा मैदान प्रवेश गरेका थिए । आर्मीले समूह ‘सी’को विजेता बन्दै सेमिफाइनलमा स्थान पक्का गरेको थियो । आर्मीले लिग चरणको पहिलो खेलमा लुम्बिनी प्रदेशलाई ४–१ र दोस्रो खेलमा नेपाल पुलिस क्लबलाई २–० ले हराएको थियो ।