योगेश भट्टराईको जिकिर-‘एमालेमा अहिले कुनै गुट छैन’

काठमाडौँ- नेकपा एमालेका सचिव एवं सांसद योगेश भट्टराईले एमालेमा अहिले कुनै गुट नरहेको बताएका छन् ।

प्रेस चौतारी ताप्लेजुङद्वारा आयोजित पत्रकार सम्मेलनमा भट्टराईले पार्टी अध्यक्ष केपी शर्मा ओलीको नेतृत्वमा सिंगो एमाले एकताबद्ध रहेको बताएका हुन् ।

भट्टराईले देशको आवश्यकताले नेकपा एमाले र नेपाली काँग्रेसको गठबन्धन सहितको सरकार बनेकोले आगामी निर्वाचनसम्म यही गठबन्धनको सरकार रहने जिकिर गरे ।

‘देशमा विषम परिस्थिति सृजना भएकोले गत वर्ष नेकपा एमालेको नेतृत्वमा सरकार गठन भएको हो । सरकारले देशको आर्थिक स्थिति, अन्तर्राष्ट्रिय सम्बन्ध मजबुद बनाएको छ । कतिपय कानून संशोधन गरेको छ । विकासका कामलाई तीव्रता दिएको छ । ’

भट्टराईले संविधान संशोधनको समयमा स्थानीय तहको संख्या घटाएर वडाको संख्या बढाउनु पर्ने औँल्याए । त्यस्तै उपराष्ट्रपतिलाई राष्ट्रियसभाको अध्यक्ष र संवैधानिक आयोगका संख्या पनि घटाउनु पर्ने उनले बताए ।

उनले थपे, ‘हाम्रो नेतृत्वमा सरकार बनेपछि मुलुकको अर्थतन्त्र सकारात्मक दिशातर्फ अघि बढेको छ । सरकारले निजी क्षेत्रलाई प्रोत्साहन गरेर लगानीका लागि आह्वान गरेको छ । थुप्रै आर्थिक ऐन संशोधन भएका छन् । केही नयाँ बनाइएको छ ।’

जिल्लामा चालू रहेका र आउन चाहेका विकासका ठूला परियोजनालाई कतैबाट पनि अवरोध गर्न नहुने भट्टराईले बताएका छन् ।