भारतका विदेश सचिव मिश्री काठमाडौं उत्रिन्छन् भोली, आवश्यक तयारी भएपछि उता जानेछन् ओली

काठमाडौं– प्रधानमन्त्री केपी शर्मा ओलीको भारत भ्रमणको औपचारिक निम्तो र सन्देशसहित नेपालसँगका विभिन्न सम्झौताबारे छलफलका लागि विदेश सचिव विक्रम मिश्री आइतबार (भोली) काठमाडौं उत्रिने भएका छन्।

परराष्ट्र मन्त्रालयले विज्ञप्ति जारी गर्दै उनको नेपाल भ्रमणबारेर जानकारी गराएको हो। नेपाल बसाइको क्रममा उनले प्रधानमन्त्री ओली, परराष्ट्र मन्त्री आरजु राणा देउवा लगायतलाई भेट्ने कार्यक्रम तय भएको छ।

भदौको अन्तिममा ओलीको भारत भ्रमणको चाँजोपाँजोका विषयमा पनि उनले जानकारी दिनेछन्।

परराष्ट्र सचिव अमृतबहादुर राईको निमन्त्रणामा उनी नेपाल भ्रमणमा आउन लागेका हुन्। भ्रमणका क्रममा नेपाल र भारतका परराष्ट्र सचिवबीच नेपाल–भारत साझेदारीका विभिन्न पक्षमा छलफल हुने जनाइएको छ। उनी भदौ २ गते नयाँ दिल्ली फर्किनेछन्।