एमालेको असहमतिले धरानमा बजेटको सिलिङ तोकिएन, बैठक भोलिका लागि सर्‍यो

काठमाडौँ । धरान उपमहानगरपालिकामा बुधबार तोकिनुपर्ने बजेटको सिलिङ कार्यपालिकाको सबैभन्दा ठुलो दल नेकपा एमालेको असहमतिपछि स्थगित भएको छ । 

बजेटका केही शब्दमा चित्त नबुझेको भन्दै एमालेले थप समय मागेपछि सिलिङ तोक्ने बैठक भोलि बिहीबारका लागि सारिएको हो । उपमहानगरपालिकाका प्रवक्ता मनोजकुमार भट्टराईले आज सिलिङ टुङ्ग्याउने तयारी भए पनि एमालेका कारण सम्भव नभएको जानकारी दिए । 

‘आज हुन्छ भन्ने कुरो थियो, तर एमालेका साथीहरूले अलिकति समय माग्नुभयो र बैठक भोलिलाई सर्‍यो,’ प्रवक्ता भट्टराईले भने । ‘समग्र सिलिङमा नभई केही शब्द र अंशमा उहाँहरूको असहमति रहेछ ।’यसअघि बजेट प्रक्रिया सुरु गर्न ढिलाइ भएपछि मेयर हर्क साम्पाङले स्थानीय सरकार सञ्चालन ऐन, २०७४ ले दिएको ‘अवशिष्ट अधिकार’ प्रयोग गरेर भए पनि बजेट ल्याउने चेतावनी दिएका थिए । 

धरान उपमहानगरको ३० सदस्यीय कार्यपालिकामा नेकपा (एमाले) स्पष्ट बहुमतमा छ । एमालेसँग  १८, नेपाली काँग्रेस ७, नेकपा माओवादी केन्द्रसँग उपप्रमुख सहित २,  राप्रपासँग २ सदस्य र मेयर हर्क साम्पाङ एक स्वतन्त्र छन् ।