काँग्रेसले भन्यो- कुलिङ पिरियडको पक्षमा छौँ, पदको दुरुपयोग गर्नेलाई कारबाही गर्नुपर्छ

काठमाडौँ- सत्तारुढ दल नेपाली काँग्रेसले निजामती विधेयकको कुलिङ पिरियडसम्बन्धी व्यवस्थामा छेडखानी गरेर विश्वासघात गरेको टिप्पणी गरेको छ ।

जारी केन्द्रीय समितिको बैठक स्थल सानेपामा सञ्चारकर्मीहरूसँग कुरा गर्दै प्रवक्ता डा. प्रकाशशरण महतले कुलिङ पिरियड राख्नुपर्छ भन्ने नै पार्टीको धारणा भएको बताए ।

उनले भने, ‘सर्वसम्मत समितिबाट कुलिङ पिरियड राखियो भनेर निर्णय गरियो भनियो, त्यही विश्वासमा सायद फुल हाउसमा माननीय सदस्य साथीहरूले बुँदागत रूपमा दफावार पढ्नुभएन । विश्वासघात भयो ।’

उनले पदको दुरुपयोग गर्नेहरूलाई छानबिनको दायरामा ल्याएर कारबाही गर्नुपर्ने बताए ।

प्रवक्ता महतले थपे, ‘तत्काल कुलिङ पिरियड हटाएर प्रस्तावित भएको छ, भोलि संशोधन ल्याएर संशोधन गर्नुपर्छ, दोषीलाई छानबिन गरी कारबाही गर्नुपर्छ । माथिल्लो सदनमा बाँकी छ रोकिहाल्छ । पहिले जे सहमति थियो, त्यही कार्यान्वयन हुनुपर्छ ।’