रुपन्देही-३ मा संघीय लोकतान्त्रिक मोर्चाले नाउपालाई सघाउने

काठमाडौँ- मधेश केन्द्रित सात दल सम्मिलित संघीय लोकतान्त्रिक मोर्चाले काठमाडौँसहित ६ स्थानमा सभा गर्ने भएको छ ।

लाजिम्पाटस्थित एक होटेलमा बसेको मोर्चाको बैठकले देशका ६ स्थानमा सभा गर्ने निर्णय गरेको जनमत पार्टीका प्रवक्ता डा. शरद यादवले बताए ।

उनका अनुसार मोर्चाले साउन १७ गते काठमाडौं, २१ गते भैरहवा, २३ गते कैलाली, भदौ १६ गते विराटनगर, १८ गते जनकपुर र २० गते वीरगन्जमा सभा आयोजना गर्नेछ ।

बैठकले मोर्चाको कार्यविधि पनि पारित गरेको छ। रुपन्देही ३ को उपनिर्वाचनमा मिलेर जानेमा सबै दल एकमत रहेको उनले बताए ।

उनले भने, ‘मिलेर जानुपर्छ भन्नेमा सबै दल एक ठाउँमा छौँ। अब कुन पार्टीबाट उम्मेदवारी दिने भन्ने निष्कर्षमा पुगेका छैनौँ। अहिले छलफल सुरु भएको छ। बिस्तारै निष्कर्षमा पुगिएला ।’

त्यहाँ नागरिक उन्मुक्ति, जनता समाजवादी पार्टी नेपाल, लोकतान्त्रिक समाजवादी पार्टी नेपाल र जनमत पार्टीले दाबी गरेका छन्। मोर्चाको बैठकमा सहभागी एक नेताले नाउपाको उम्मेदवारलाई सघाउने सहमति जुट्ने दाबी गरे ।

नाउपाका संरक्षक रेशम चौधरीले यसअघि कै बैठकमा आफ्नो पार्टीले गएको निर्वाचनमा राम्रो मत ल्याएको भन्दै दाबी पेस गरेका थिए ।

गएको निर्वाचनमा समानुपातिकतर्फ नाउपाले ६ हजार १०, जसपा नेपालले ५ हजार २९१, लोसपाले ५ हजार ५३ र जनमतले ३ हजार ७३२ मत ल्याएका थिए ।