स्कटल्याण्डविरुद्ध नेपालले टस जित्यो, पहिला बलिङ गर्ने

काठमाडौँ । नेपालले त्रिकोणात्मक टी-२० सिरिज अन्तर्गत आज स्कटल्याण्डको सामना गर्दैछ ।

यस खेलमा नेपालले टस जितेर पहिला बलिङ गर्ने निर्णय गरेको छ । नेपाली कप्तान रोहित पौडेलले टस जितेर पहिला बलिङ गर्ने निर्णय गरेका हुन् । योसँगै स्कटल्याण्डले पहिला ब्याटिंग गर्ने भएको छ ।   

स्कटल्याण्डमा हुने यो सिरिजको पहिलो खेलमा स्कटल्याण्डले नेदरल्याण्डसलाई पराजित गरेर विजयी शुरुवात गरेको छ भने दोस्रो खेलमा नेपाल नेदरल्यान्ड्ससँग सुपर ओभरमा पराजित भएको थियो । 

नेपाल र स्कटल्याण्डबीच अहिलेसम्म केवल एक टी-२० २०१३ मा खेलिएको थियो, जुन स्कटल्याण्डले जितेको थियो ।   

आइसीसीको टी-२० वरियतामा नेपाल १८औं स्थानमा छ भने नेदरल्याण्डस १३औं स्थानमा रहेको छ ।

२० जुनसम्म हुने यो त्रिकोणात्मक टी-२० सिरिजमा बुधबार स्कटल्याण्ड र नेदरल्याण्डस, विहिबार नेपाल र नेदरल्याण्डस तथा शुक्रबार नेपाल र स्कटल्याण्ड खेल्ने तालिका रहेको छ ।

आजको खेलमा नेपालले एक परिवर्तन गरेको छ । आज नन्दन यादवको स्थानमा बसिर अहमद खेलिरहेका छन् ।  

आज रोहित पौडेल (कप्तान), दीपेन्द्रसिंह ऐरी (उपकप्तान) कुशल भुर्तेल, अनिल शाह, बसिर अहमद, ललित राजवंशी, सन्दीप लामिछाने, करण केसी, किरणकुमार ठगुन्ना, रुपेश सिंह र लोकेश बम खेलिरहेका छन् ।