यातायात कार्यालयका सहायक र बिचौलिया १ लाख ८५ हजार घुससहित पक्राउ

चितवन- यातायात व्यवस्था कार्यालय, भरतपुर, चितवनमा सवारी चालक अनुमति पत्र (लाइसेन्स) परीक्षामा भ्रष्टाचार गरेको आरोपमा कार्यालय सहायक इन्द्रजित गुरुङ र बिचौलिया सुरज पाठकलाई अख्तियार दुरुपयोग अनुसन्धान आयोगले पक्राउ गरेको छ।

उनीहरूलाई कार्यालय परिसरबाट १ लाख ८५ हजार रुपैयाँ नगदसहित नियन्त्रणमा लिइएको हो।

आयोगका प्रवक्ता राजेन्द्र कुमार पौडेलका अनुसार, यातायात कार्यालयका कर्मचारी र महालक्ष्मी, गुरुङ, तथा कुमार ड्राइभिङ सेन्टरका सञ्चालकहरूको मिलेमतोमा लाइसेन्स परीक्षामा असफल भएका परीक्षार्थीहरूलाई पास गराउन रकम लिने गरिएको थियो। सवारीको वर्गअनुसार १५ हजारदेखि २५ हजार रुपैयाँ लिएर असफल प्रशिक्षार्थीहरूलाई पास गराउने गैर कानुनी कार्य भएको उजुरीका आधारमा आयोगको टोलीले छापा मारेको हो।

आयोगको टोलीले कार्यालय सहायक गुरुङको कार्यकक्षबाट १ लाख ८५ हजार नगद बरामद गरेको छ। साथै, कार्यालय प्रमुख विष्णु भट्टराईलगायत अन्य कर्मचारी र ड्राइभिङ सेन्टर सञ्चालकहरूको ३१ वटा मोबाइल, २ वटा ल्यापटप र अन्य कागजातहरू नियन्त्रणमा लिएको छ। यी सामग्रीहरू थप अनुसन्धानका लागि जफत गरिएको आयोगले जनाएको छ।

अख्तियारले यो प्रकरणमा संलग्न अन्य व्यक्तिहरूमाथि पनि अनुसन्धान जारी राखेको छ।