प्रत्यारोपणमा उपयोग हुने वस्तु सरकारी फार्मेसीमै अनिवार्य गर्न मन्त्रालयको परिपत्र

काठमाडौँ- स्वास्थ्य तथा जनसङ्ख्या मन्त्रालयले मुटु, हड्डी लगायत विभिन्न किसिमका शल्यक्रिया तथा प्रत्यारोपणमा प्रयोग हुने सामग्रीहरू अबदेखि अनिवार्य रूपमा अस्पतालकै सरकारी फार्मेसीबाट उपलब्ध गराउने व्यवस्था गर्न परिपत्र जारी गरेको छ ।

सरकारी फार्मेसीमा यस्ता सामग्री नपाइने र मूल्य पनि स्पष्ट नहुने भएकाले बिरामीहरूले ती सामग्री अत्यधिक महँगोमा निजी विक्रेताबाट किन्नुपरेको गुनासो बढेसँगै मन्त्रालयले यस्तो निर्णय गरेको हो ।

स्वास्थ्य मन्त्री प्रदीप पौडेलको निर्देशनमा अब नयाँ आर्थिक वर्षदेखि यस्ता वस्तुहरू सरकारी फार्मेसीमै उपलब्ध गराउने र त्यसको मूल्य समेत सबै बिरामीले देख्ने गरी सार्वजनिक गर्ने निर्णय गरिएको मन्त्रालयका प्रवक्ता डा. प्रकाश बुढाथोकीले जानकारी दिए ।

साथै, कुनै नयाँ सामग्री आवश्यक परेमा त्यसको कम्पनी, आधिकारिक विक्रेता र मूल्यसमेत सार्वजनिक गरेर मात्र बिरामीलाई उपलब्ध गराउन सकिने व्यवस्था गर्न मन्त्रालयले सबै अस्पतालहरूलाई निर्देशन पठाएको छ ।

मन्त्रालयले बिरामीबाट आउने गुनासोको सम्भावना हटाउन अस्पतालहरूलाई समयमै सजग रहन पनि सचेत गराएको छ।