पोखरेलमाथि कन्सल्टेन्सीको आवरणमा ठगीको आरोप, करोडौंको सम्पत्ति पत्नीका नाममा 

काठमाडौं– विराटनगरस्थित हिमगुण कन्सल्टेन्सीका सञ्चालक कृष्णहरी पोखरेलले ऋण तिरिदिने बहानामा करोडौंको सम्पत्ति हत्याएको भन्दै पीडितहरु न्यायका लागि हारगुहार गर्न थालेका छन्।

सीमित ऋण तिरिदिएर विराटनगर र झापा दमकस्थित मुख्य बजारकै घर जग्गा हत्याएपछि घर न घाटको अवस्थामा पुगेका पीडितहरु न्यायको खोजीमा लागेका हुन्। 

विराटनगर महानगरपालिकाका–११ जनपथ टोल कान्छा दाई मार्गको साढे दुई तलाको घर करिब १७ धुरमा बनेको छ। जसको मुल्य अहिले ४ करोड भन्दा माथि पर्छ। जुन घरका धनी थिए स्थानीय ताराकुमार तुम्रोक। उनले आफ्नो घर एनएमबी बैंकमा धितो राखेर ८५ लाख ऋण थिए। त्यहि ऋण सल्टाउन भन्दै तुम्रुकले घर बेच्न खोजे। 

त्यही समयको मौका छोप्दै पहिलेदेखिनै चिनजान भएका पोखरेलले पछि बढी मुल्यमा बेचिदिने लोभ देखाएर बैंकको ऋण तिरिदिए र घर जग्गा आफ्नो पत्नीका नाममा गराए। ८५ लाखमै करोडौंको सम्पत्ति नामसारी गर्न सफल पोखरेल अहिले ढुक्क सँग बसेका छन्। पीडितले पटक–पटक पहल गर्दा पनि घर फिर्ता ल्याउन नसकेपछि न्यायका लागि दौडधुपमा लागेका छन्। 

पोखरेलबाट ठगीनेमा ताराकुमार त एक उदाहारण मात्र हुन्। झापाको दमकस्थित कुमारी लावती २ कठ्ठा ८ धुरको घरजग्गा पनि पोखरेलले त्यसैगरी आफ्नो पत्नी बिनिता ढकालको नामममा ल्याएका छन्। सुरुमा बैंकको सिमिति ऋण तिरिदिएर करोडौंको घर जग्गा आफ्नो नाममा पारेका पोखरेलले अहिले २४ प्रतिशत ब्याज लगायत बहानाबाजी गर्दै घर जग्गा फिर्ता गर्न मानेका छैनन्। एकाएक घरबास नै उठेपछि अहिले लावती न्यायका लागि हारगुहार गरिरहेकी छिन्। 

यस्ता अन्य घटनाहरु पनि थुप्रै हुन सक्ने अनुमान गरिएको छ।

कन्सल्टेन्सी सञ्चालक पोखरेलले भने आरोपबारे जानकारी नभएको प्रतिक्रिया दिएका छन्। ‘मलाई यो केही पनि थाहा छैन, मैले कसैको केही सम्पत्ति खाएको छैन। म धितो मुल्याङ्कन गर्ने इन्जिनियरिङ्ग कन्सल्टेन्सी सञ्चालक हुँ। कानुन अनुसार त्यही चलाएर बस्छु’, पोखरेलले भने।

पोखरेलले केही पनि थाहा नपाएको दाबी गरिरहँदा पीडितहरु भने न्यायका लागि भौतारिरहेका छन्। 

सीमिति मुल्य तिरेर करोडौंको सम्पत्ति गुमाउनेहरुमा तुम्रुक र कुमारी मात्र होइन अरुपनी थुप्रै व्यक्तिहरु छन्। मोरङ, सुनसरी, झापा लगायत स्थानका पीडितहरु न्यायको खोजीमा छन्। 

मोरङमा राम्रो पहुँच र प्रतिष्ठा बनाएका पोखरेल विराटनगरकै धनीमानीमा गनिन्छन्। तर जग्गाको मूल्याकंन गर्ने कन्सल्टेन्सी चलाएर बसेका उनीमाथि धितो मुल्याङ्कनमा समेत तलमाथि गरेर बैंकलाई समेत अप्ठेरोमा पारेको आरोप लागेको छ। 

उनले स्वयम आफ्नै घर भित्रको करोडौंको सम्पत्ति पनि आफन्तलाई झुक्याएर आफ्नो पत्नीको नाममा पारेको आरोप लागेको छ।

अहिले उनिहरुको घरभित्रको अंशबण्डाको विषयमा अदालतसम्म पुगेको छ। पोखरेलविरुद्ध सम्पत्ति शुद्धिकरण अनुसन्धान विभागमा उजुरी परेको पनि बताइन्छ।