होलान् त हृदयेन्द्र शाह नयाँ राजा, बेबी किङको चर्चा चलिसकेका व्यक्तिबारे कमल थापा के भन्छन्?

काठमाडौं– राजसंस्थावादी शक्तिको आन्दोलनको पूर्वसन्ध्यामा विभिन्न मिडियाका सम्पादकहरुसँगको संवादका क्रममा नयाँ राजाका रुपमा हृदयेन्द्र शाहको नाम चर्चामा ल्याइएको छ।

सहमतिमा राजसंस्था आउँदा हृदयेन्द्र शाहको नाम आयो भने ज्ञानेन्द्र शाह सहमत हुनुपर्ने राप्रपा नेपालका अध्यक्ष कमल थापाको जिकिर छ। 

ज्ञानेन्द्र वा पारस कसरी राजा बन्न सक्छन्? विवादको चाङ देखाएका सम्पादकहरुको जिज्ञासामा थापाले त्यसो भनेका हुन्। 

ज्ञानेन्द्र कसरी सुध्रिएको मान्ने? पारस कसरी राजा हुन सक्छन्? भन्ने पत्रकारको प्रश्नको जवाफमा उनले भने, ’हृदयेन्द्रका नाममा सहमति भए ज्ञानेन्द्र पनि त्यसमा आउनुपर्छ। राजतन्त्र भनेको व्यक्तिको कुरा होइन। यो विचार हो। पृथ्वीनारायण शाहका उत्तराधिकारी नै हुने हो भन्ने हाम्रो मत छ। अहिले व्यक्ति को हुने भन्ने कुरा मुख्य होइन।’

हृदयेन्द्र शाह चार बर्षको हुँदा नै तत्कालिन प्रधानमन्त्री गिरिजाप्रसाद कोइरालाले बेबी किङको प्रस्ताव गरेका थिए। गणतन्त्रको रापतापका बेला उक्त बेला कोइरालाको बिरोध भएको थियो। तर अहिले तिनै हृदयेन्द्र लक्का जवान भैसकेका छन्।