विश्व सम्पदा क्षेत्रमा बिना अनुमति कार्यक्रम, काठमाडौं महानगरको आपत्ति

काठमाडौं- काठमाडौं महानगरपालिकाले हनुमानढोका दरबार क्षेत्रमा हालै आयोजित 'इण्डियन आइडल' कार्यक्रमप्रति गम्भीर आपत्ति जनाएको छ।

दरबार क्षेत्रजस्तो संवेदनशील विश्व सम्पदा क्षेत्रमा बिना पूर्वस्वीकृति कार्यक्रम सञ्चालन गरिएकोमा महानगरले आपत्ति जनाउँदै यस्ता गतिविधि दोहोरिन नदिन सचेत गराएको छ।

बुधबार आयोजित सो कार्यक्रममा सम्पदा क्षेत्रमै मञ्च निर्माण, ठूलो आवाज प्रयोग तथा खाद्यपदार्थ बिक्रीजस्ता गतिविधिहरू भएको जनाइएको छ। यस्ता कार्यहरू प्राचीन स्मारक संरक्षण ऐन, २०१३ को दफा ९ को उपदफा (४) विपरीत भएको महानगरको ठहर छ।

महानगरको सम्पदा तथा पर्यटन विभाग प्रमुख कुमारी राईद्वारा हस्ताक्षरित पत्रमा भनिएको छ, “सम्पदा क्षेत्रको संरक्षण संवर्द्धनका दृष्टिकोणले यस्ता गतिविधि नगरिकन पुरातत्व विभागको स्वीकृति लिएर मात्र कार्यक्रम गर्न अनुरोध गरिन्छ।”

यस घटनाको जानकारी पुरातत्व विभागलाई समेत पठाइएको छ। दरबार क्षेत्रको ऐतिहासिक महत्वलाई मध्यनजर गर्दै आगामी दिनमा कुनै पनि कार्यक्रम गर्दा सावधानी अपनाउन महानगरले सबैलाई सचेत गराएको छ।