किट विश्वविधालयको होस्टेलमा नेपाली छात्रा मृत भेटिएको विषयमा ओडिशा प्रहरीले के भन्यो ?

काठमाडौँ - भारतको भुवनेश्वरस्थित कलिंगा इन्स्टिच्युट अफ इन्डस्ट्रियल टेक्नोलोजी (किट) को होस्टेलमा एक नेपाली विद्यार्थी मृत फेला परेको ओडिशा प्रहरीले जनाएको छ ।

भुवनेश्वरका प्रहरी आयुक्त एस. देव दत्त सिंहले बिहीबार साँझ ७ बजेतिर प्रेशा शाहको शव होस्टेलको कोठामा फेला परेको बताए । उनले भने- 'फोरेन्सिक र प्रहरी टोली तुरुन्तै घटनास्थलमा पुगेको थियो र घटनामा अप्राकृतिक मृत्युको मुद्दा दर्ता गरिएको छ ।'

प्रहरी आयुक्तले घटनाको बारेमा विद्यार्थीका अभिभावक र नेपाली दूतावासलाई जानकारी गराइएको बताए । उनले यस विषयमा प्रहरीले अनुसन्धान सुरु गरेको बताए ।

नेपालका परराष्ट्रमन्त्री आरजु राणा देउवाले नेपाल सरकारले दिल्लीस्थित आफ्नो दूतावासमार्फत यस विषयमा निगरानी गरिरहेको बताएकी छन् ।

उनले भनेकी छन्- 'भारतको ओडिसास्थित कलिंगा इन्स्टिच्यूट अफ इन्डस्ट्रियल टेक्नोलोजी (केआईआईटी)  विश्वविद्यालयमा अध्ययनरत नेपाली छात्रा प्रिसा साह आफ्नै होस्टेल कोठामा मृत भेटिएको घटनाले निकै मर्माहित बनाएको छ।

प्रिसाको आत्माको चिर शान्तिको कामना गर्दै यस दुखद घडीमा उनको परिवाजनमा गहिरो समवेदना व्यक्त गर्दछु । परराष्ट्र मन्त्रालयले घटना लगत्तै हिजो नै भारत सरकार, ओडिसा सरकारका उच्च अधिकारीहरु र दिल्लीस्थित नेपाली दूतावास मार्फत घटनाको सत्य तथ्य छानविन गर्न कूटनीतिक पहल थालेको छ ।'

भारतका लागि नेपालका राजदूत डा. शंकर पी शर्माले प्रेशा शाहको निधनमा शोक व्यक्त गरेका छन् । शर्माले भारतीय विदेश मन्त्रालय, ओडिशा सरकार, प्रहरी र विश्वविद्यालयसँग सम्पर्कमा रहेको बताएका छन् ।

किटमा अर्की नेपाली विद्यार्थीको मृत्यु भएपछि अखिल भारतीय विद्यार्थी परिषद् (एबीभीपी) ओडिशाले विश्वविद्यालयविरुद्ध कडा कारबाहीको माग गरेको छ । विज्ञप्ति जारी गर्दै एबीभीपीले यस्ता गम्भीर घटना दोहोरिँदा पनि राज्य सरकार चुप बसिरहेको भन्दै तत्काल कडा कदम चाल्न माग गरेको हो । उक्त घटनाप्रति गहिरो दुःख व्यक्त गर्दै एबीभीपी ओडिशाले राज्य सरकारको मौनताप्रति प्रश्न उठाउँदै घटनालाई ‘घिनलाग्दो र लाजमर्दो’ भनेर टिप्पणी गरेको छ ।

यसअघि फेब्रुअरी १६, २०२५ मा किटमा नेपाली विद्यार्थी प्रकृति लम्साल पनि होस्टेलमा मृत फेला परेकी थिइन्।