लमजुङ– बेसीशहर नगरपालिकाले आयोजना गरेको चौथो मेयर कप फुटबल प्रतियोगिताको उपाधि वडा नं. १ उदिपूरले हात पारेको छ ।
लमजुङको सदरमुकाम सहजी खेल मैदानमा आज भएको फाइनल खेलमा वडा नं. १ उदिपूरले वडा नं. १० लाई ३–२ गोल अन्तरले हराउँदै चौथो मेयर कप–२०८० वडा स्तरीय फुटबल प्रतियोगिताको उपाधी हात पारेको हो ।
बेसीशहर १० बाँझाखेतले भने उपविजेतामा चित्त वुझाएको छ । विजेता वडा नं. १ उलिपूरलेले नगद १ लाख रुपैयाँ, शिल्ड, मेडल र प्रमाण पत्र हात पारेको छ । उपविजेता वडा नं. १० ले नगद ५० हजार, मेडल र प्रमाणपत्र हात पारेको छ ।
विजेता टिमलाई बेसीशहर नगरपालिकाका प्रमुख गुमानसिंह अर्याल, उपप्रमुख पद्मा गुरुङ, नगर खेलकुद विकास समितिका अध्यक्ष सिजन श्रेष्ठ लगायतले पुरस्कार, मेयर कप, ट्रफी, प्रमाणपत्र, मेडल वितरण गरेका थिए । प्रतियोगितामा बेसीशहर १० का रविन तामाङ सर्वोत्कृष्ट खेलाडी घोषित भएका छन् । उनले नगद ५ हजार रुपैयाँ ट्रफी र प्रमाणपत्र हात पारेका छन् ।
कार्यक्रमलाई सम्बोधन गर्दै नगर प्रमुख अर्यालले खेल क्षेत्रको विकासका लागि नगरपालिका सँधै लागिपर्ने र पर्याप्त बजेट बिनियोजन गरिने बताए । प्रमुख अर्यालले वडाहरुले पनि खेलकुद क्षेत्रका लागि बजेट विनियोजित गर्नुपर्ने बताए ।
बेसीशहर लमजुङ जिल्लाको सदरमुकाममा रहेको पालिका भएकाले पनि अन्य पालिकाको रुपमा यहाँ खेल गतिविधि प्राथमिकताका साथ सञ्चालन भइरहेको बताए । प्रतियोगिता गत मंसिर १९ गतेदेखि सुरु भएको हो ।
प्रतियोगितामा बेसीशहर नगरपालिकाभित्र रहेको ११ वटै वडाहरुको सहभागिता रहेको थियो । प्रतियोगिताबाट नगर खेलकुद विकास समिति बेसीशहरले पहिलो चरणमा ३५ जना खेलाडी छनौट गरेको छ । पुष १२ गतेदेखि सुरु हुने ३१ औँ त्रिवेणी कपमा सहभागी गराउनका लागि खेलाडी छनौट गरिएको नगर खेलकुद विकास समितिका अध्यक्ष सिजन श्रेष्ठले बताए ।
