विराटनगर– कोशी प्रदेशका मुख्यमन्त्री केदार कार्कीले कोशी प्रदेशसभामा पेस भएको प्रतिस्थापन बजेट विधेयक लोककल्याणकारी हुने दावी गरेका छन् ।

विधेयकका सम्बन्धमा आइतबार विराटनगरस्थीत आर्थिक मामिला तथा योजना मन्त्रालयको सभाहलमा आयोजित पत्रकार सम्मेलनमा उहाँले विशेष परिस्थितिमा संस्थागत रुपमा नयाँ बजेट आएको स्पष्ट पारे । 

योजना आयोगको प्राथमिकताका साथै प्रदेशको गरिमालाई अघि बढाउन बजेटले बाटो तय गर्ने उनले बताए । उनले अहिलेको प्रतिस्थापन बजेट विधेयक सवैको साझा भएको जिकिर गर्दै सहजै पारित हुने समेत बताए ।

मुख्यमन्त्री कार्कीले प्रतिस्थापन बजेटमा ल्याइएका कतिपय कार्यक्रमहरु आफुहरुसंग रहेको नगद मौज्दातका कारण राखिएको र स्रोत अभाव नहुने पनि बताए । आर्थिक मामिला तथा योजना मन्त्रालयको समेत जिम्मेवारी लिएका मुख्यमन्त्री कार्कीले अध्यादेश बजेट भन्दा ५० करोड बढीको अर्थात करिब ३६ अर्ब ७४ करोड ३५ लाख रुपैयाको बजेट मंसिर ९ गते प्रदेश सभा बैठकमा पेश गरेका थिए ।