काठमाडौँ– नेकपा एमालेका अध्यक्ष तथा संसदमा प्रमुख विपक्षी दलका नेता केपी शर्मा ओलीले सरकारले ल्याएको नीति तथा कार्यक्रमले देश नबाउने र एक वर्षको समय बर्बाद मात्रै गर्ने बताएका छन् ।

आज प्रतिनिधि सभामा सरकारको आगामी आर्थिक वर्षको नीति तथा कार्यक्रमको छलफलमा भाग लिदै अध्यक्ष ओलीले यस्तो बताएका हुन् ।

‘यो नीति तथा कार्यक्रमले केही गर्नेवाला छैन । देशको कम्तिमा एक वर्षको समय बर्बाद भयो । म सबै पार्टीका सांसदहरुलाई यो नीति तथा कार्यक्रमलाई समर्थन नगर्न आग्रह गर्दछु,’ पूर्वप्रधानमन्त्रीसमेत रहेका एमाले अध्यक्ष ओलीले भने ।

सरकारले ल्याएको नीति तथा कार्यक्रम पारित गर्न योग्य नै नभएको उनको आरोप छ । उनले नीति तथा कार्यक्रम नामको पोथा मात्रै आएको उनको भनाइ छ । ओलीले यो नीति तथा कार्यक्रम फिर्ता लिएर अर्काे बनाउन प्रधानमन्त्रीलाई पनि आग्रह पनि गरे । देशको आर्थिक अवस्था सुधार नगर्ने, देशलाई अघि नबढाउने र जनताको जीवनस्तरमा सुधान नल्याउने नीति तथा कार्यक्रम ल्याइएको उनको भनाइ छ ।