काठमाडौं –राष्ट्रिय स्वतन्त्र पार्टीका सभापति रवि लामिछानेले पार्टी अब प्रतिपक्षमा बस्ने बताएका छन् ।
पार्टीको केन्द्रीय समिति र संसदीय दलको संयुक्त पछि पत्रकारसँग कुरा गर्दै सभापति लामिछानेले अब रचनात्मक प्रतिपक्ष कस्तो भनेर संसदमा देखाउने बताए ।
‘जनताले रचनात्मक प्रतिपक्ष कस्तो हुन्छ भनेर हेर्न चाहेका छन् । अब देखाउँछौँ’ उनले भने ।
उनले सरकारको लक्षण सकारात्मक नभएकाले आफूहरूले प्रतिपक्षमा बस्ने निर्णय गरेको पनि बताए । ‘प्रचण्ड नेतृत्वको गठबन्धन सरकारले राम्रो काम नगर्ने छनक देखेपछि प्रतिपक्षमा बस्ने निर्णय भएको हो’, उनले भने ।
‘प्रधानमन्त्रीले सरकारमा आउनुस्, पूर्ववत् मन्त्रालय लिएर काम गरौँ भनेको पनि हो । तर सरकारको गति देखेर जान मन लागेन’, उनले भने, ‘मन्त्रिपरिषद् विस्तारदेखि न्यूनतम् साझा कार्यक्रम हेर्दा सरकारले गरिखाने देखिएन । यो ढंगले जाने हो भने काम हुँदैन भन्ने हाम्रो निष्कर्ष हो’, उनले भने ।
उनले प्रधानमन्त्री प्रचण्ड र गठबन्धनका अन्य नेताहरुले पनि रास्वपा सरकारमा आइदिए हुन्थ्यो भन्ने अपेक्षा राखे पनि अब प्रतिपक्षमा बस्ने बताए ।
उनले भने, ‘देशमा स्थिरताको अवस्था आयो भने हामी सरकारमा फर्किन्छौ ँ। हामी सत्ताका लागि जे पनि गर्ने पक्षमा छैनौँ । जनताले प्रतिपक्षमा बस्न दिएको म्यान्डेटलाई अघि बढाएर काम गर्छौँ ।’
पूर्वगृहमन्त्री समेत रहेका लामिछानेले नक्कली भुटानी शरणार्थीका नाममा भएको ठगीका बारेमा आफूले सरकारमा हुँदै जानकारी पाएको र भित्री रुपमा अनुसन्धान अघि बढाएको दाबी गरे ।
