काठमाडौँ– नेपाल उद्योग बाणिज्य महासंघ (एफएनसीसीआई) निर्वाचनमा वरिष्ठ उपाध्यक्ष पदका प्रत्याशी अन्जन श्रेष्ठले आफ्नो टिम घोषणा गर्दै वाचापत्र सार्वजनिक गरेका छन् ।
एफएनसीसीआईको आगामी चैत २९ गते हुने निर्वाचनको लागि श्रेष्ठले आज अरण्य होटल, हात्तिसारमा आयोजित घोषणासभामार्फत औपचारिक रुपमा टिमको घोषणा गर्दै वाचापत्र सार्वजनिक गरेका हुन् ।
वाचापत्र सार्वजनिक गर्दै ‘जिवन्त, जिम्मेवार र जोशिलो’ निजी क्षेत्रको लागि आफुले उम्मेदवारी दिएको श्रेष्ठले बताए ।
घोषणा कार्यक्रमा उनले स्थानीय उत्पादनहरुको प्रवद्र्धन गर्दै औद्योगिक विकासमा अगाडि बढ्नुपर्ने बताए । नेपाल जस्तो मुलुकमा कुनै पनि व्यवसाय टिकाउनको लागि व्यवसाय विस्तार गर्न जरुरी भएको भन्दै श्रेष्ठले निजी क्षेत्रको नेतृत्वले साना र मझौला व्यवसायीको समस्यालाई समेत सम्बोधन गरेर सँगै अगाडि बढ्नुपर्ने समेत बताए ।
महासंघलाई नयाँ उचाईमा पुर्याउन र संस्थाको व्यवसायीक क्षमता अभिवृद्धिका साथै संस्थागत प्रभावकारीता बढाउन आफ्नो वाचापत्रलाई आधार मानेर काम गर्ने उनको भनाई छ ।
आफ्नो टिमले सहभावना र सहकार्यको मुल आधारलाई लिएर अगाडि बढ्ने र हरेक उद्योग व्यवसायीलाई महासंघमा पहिचान दिलाउने प्रतिबद्धता उनले जाहेर गरे ।
कार्यक्रममा श्रेष्ठको समूहबाट जिल्ला नगरतर्फका उपाध्यक्षमा अरुणराज सुमार्गी, वस्तुगत तर्फका उम्मेदवारतर्फ मनिष लाल प्रधानले आफ्नो उम्मेदवारी घोषणा गरे ।
अन्जन श्रेष्ठ समूहसँग सहकार्य गर्दै एसोसिएट्सतर्फ उपाध्यक्ष पदमा स्वतन्त्र प्यानलबाट उम्मेदवारी दिएका भरतराज आचार्यले सामूहिकतामा विश्वास गर्ने हुँदा सोहिअनुसार सहकार्य गरिएको बताए ।
त्यस्तैगरी, श्रेष्ठ समूहको तर्फबाट वस्तुगत समूह तथा जिल्ला नगरतर्फका प्यानल सदस्यहरुले समेत आफ्नो उम्मेदवारी औपचारिकरुपमा घोषणा गरेका छन् ।
