काठमाडौँ– नेकपा एमालेका अध्यक्ष केपी शर्मा ओलीले प्रधानमन्त्री एवं माओवादी केन्द्रका अध्यक्ष पुष्पकमल दाहाल प्रचण्डले हातमा चक्कु बोकेर आफूलाई फूल बोकेको भन्दै छक्याउन खोजेको टिप्पणी गरेका छन् । 

आइतबार काठमाडौँमा आयोजित सहिद, बेपत्ता तथा घाइतेका परिवारको सम्मानमा आयोजित कार्यक्रमलाई सम्बोधन गर्दै ओलीले प्रचण्डले झुक्याउन खोजे पनि आफ्नो आँखाले पनि धोका नखाएको बताएका हुन् । 

२ महिनाअघि जुटेको एमाले र माओवादी केन्द्रको सत्ता सहकार्य राष्ट्रपति चुनावको विषयलाई लिएर विभाजित भएको छ । सोही सन्दर्भ उल्लेख गर्दै ओलीले भने, ‘उहाँ –प्रचण्ड) हातमा चक्कु लिएर बस्नुभएको थियो । तर, फूल लिएर बसेको छु भन्नुभयो । तपाईंलाई चक्कुजस्तो लाग्यो होला, तर यो फूल नै हो भन्नुभयो । मैले पत्याएर बसेँ । तर, मेरो आँखाले धोका खाएको थिएन ।’

प्रचण्डलाई पटक–पटक प्रधानमन्त्री बनाउन योगदान गर्ने आफ्नै पार्टीका योद्धालाई समेत धोका दिएका प्रचण्डले आफूलाई धोका दिनु नौलो नभएको ओलीले दाबी गरे ।  

‘आफ्ना सहकर्मीलाई, आफूलाई त्यस ठाउँमा पु¥याउन सहयोग गर्ने योद्धालाई त असहयोग गर्नेले मलाई कसरी सहयोग गर्नुहुन्थ्यो र ?’, ओलीले भने । 

प्रचण्डले विगत २ महिना असाध्यै कठिनताका साथ बिताएको बताएको सन्दर्भ उल्लेख गर्दै ओलीले भने, ‘हरियो देख्नेबित्तिकै दाम्लो चुँडालेर जान खोज्ने, मैले रोकिदिने । उहाँलाई कसरी सजिलो हुन्थ्यो त । मसँग काम गर्दा कालेकाले मिलेर खाउँ भाले हुन सक्दैन । जहाँ त्यसो हुन सक्छ, त्यहीँ जानु नै थियो उहाँलाई ।’

माओवादी केन्द्रले कांग्रेसका उम्मेदवारलाई राष्ट्रपति बनाउन सहयोग गर्ने निर्णय गरेपछि एमाले र माओवादी केन्द्रको सत्ता सहकार्य संकटमा परेको छ ।