मिटरब्याज पीडित भन्छन्– ‘मरेपछि सबै जग्गा हडप्छु भन्दै साहु भागेर हिँडेको छ'

पात्र १ : उमेरले ७६ वर्ष पार गर्‍यो । छोरा र नाति पुस्ताको सल्लाहकार हुने बेला प्रेमनारायण कोहिरी माइतीघरको सडकमा बसेका छन्।

६५ वर्षकी श्रीमतीसहित उनी माइतीघरको सडकमा धर्ना बसेको ७ दिन भयो । राष्ट्रले सम्मान गर्नु पर्ने ज्येष्ठ पुस्ता सडकमा अनशन बसिरहेको सरकारले नदेखे झै गर्छ ।  

कुरा २०७३ सालको हो । प्रेम नारायणले घर बनाए । घरको छत हाल्नका लागि गाउँकै साहुसँग ९ लाख ऋण लिए  । उनले लिएको नौ लाख ऋण व्याज सहित १६ लाख दिए । साहुले बन्दकी बनाएको उनको जग्गा फिर्ता गरेनन् । साहुसँग जग्गा फिर्ता लिन खोज्दा ४२ लाख ऋण पुगेको बताए । 

प्रेम नारायण ४२ लाख पनि तिर्न तयार छन् । तर, साहु जग्गा फिर्ता गर्न तयार छैनन् । ‘म मरेपछि सबै जग्गा हडप्छु भन्दै भागेर हिँडेको छन्’ गर्मीले पग्लिएला झै भएको अलकत्रा माथि बसेका प्रेमनारायण भन्छन्, ‘हामी माथि अन्याय भयो। सबै जग्गा साहुले हडप्ने तयारी गरिरहेको छन्। ९ लाख लिएको १६ लाख तिरिसकेको छु ।’

प्रेमनारायण दम्पती छोराले पनि माया नगरेको बताउँछन् । एक छोरा र एक छोरीका बाबुआमा उनीहरु ऋणकै कारण छोराको हेलामा परेको बताउँछन् । 

पात्र २ : डिलसरादेवी पनि माइतीघरको तातो सडकमै छिन् । आफूले साउदी अरब र छोराले मलेसिया बसेर कमाएको पैसा सिधै साहुको खातामा पठाउँदा पनि नपुगेपछि उनी अहिले हेलामा परेकी छिन्  । १ लाख रुपैयाँ लिएकी उनले ६ वर्ष ६ महिना साउदी अरबमा कमाएको पैसा पठाइन ।

छोराले ३ वर्ष मलेसियामा बसेर कमाएर पठाए । आमा छोराको कमाई मिलाएर १ लाखको १७ लाख पैसा तिरिसक्दा पनि बन्धकीमा भएको खेत फिर्ता भएन ।

खेत फिर्ता नभएपछि छोराले आफूले कमाएको पैसा पनि माग्न थाले । उनका श्रीमान यही पिरले थलापरेका छन् । उनी आफूले साउदी फिर्ता हुन ठिक सम्झेर पुन: साउदी जान्छिन् र कमाएर व्यवहार सुल्झाउँछिन् ।

लाउँलाउँ खाउँखाउँ भन्ने उमेरमा विदेशिएकी उनी उमेरले उकालो चडिरहेका बेला माइतीघरको तातो सडकमा छन् । आफूले १ लाखको बदलामा दिएको १७ लाख अन्याय भएको भन्दै फिर्ता दिलाइदिन सरकारसँग उनको गुहार छ । 

रामकवल चमार, खुस्बु निसा, अम्बिका महत्वको पनि माथिका पात्रहरूका प्रतिलिपि हुन् । गाउँमा भएका मिटरब्याजको आतङ्कमा परेका उनीहरु न्यायका लागि माइतीघरमा छन् । विगत लामो समयदेखि माइतीघरमा बस्दा पनि कसैले उनीहरूको समस्याका बारेमा सोधी खोजी नगरको उनीहरूको गुनासो छ। 

साहुको ऋणका कारण प्रेसर बढेर बुढाको मृत्यु भएपछि खुस्बु न्याएका लागि काठमाडौँमा आएकी छन् । राम कवल चमार पनि साहुले  ऋण भन्दा सायौँ गुणा फिर्ता गर्दा पनि अझै पैसा बाँकी छ भनिरहेको कचकच सहन नसकेर काठमाडौँ आएका हुन् ।

त्यस्तै, अम्बिका महताे आफ्नो जग्गा अरुकैले बेचिसकेको खबर पाएपछि न्याय माग्दै हिडेकी छन् । 

यसअघि १७ दिनसम्म आन्दोलन गरेपछि गृहमन्त्रालयको आश्वासनमा न्याय पाउने अपेक्षा राख्दै घर फिर्ता भएका उनीहरु १ महिनापछि पुन: काठमाडौँको माइतीघर पुगेको ब्याज पीडित तथा ठगीविरुद्धको संघर्ष समितिका अध्यक्ष रामसुरत गुप्ता बताउँछन् ।