आर्थिक वर्षको पहिलो महिनामा २४ अर्ब बढीको वैदेशिक लगानी प्रतिबद्धता
काठमाडौँ – चालु आर्थिक वर्षको पहिलो महिनामा नेपालको औद्योगिक क्षेत्रमा २४ अर्ब रुपैयाँभन्दा बढीको वैदेशिक लगानी प्रतिबद्धता आएको छ ।
उद्योग विभागले प्रकाशन गरेको तथ्यांकअनुसार साउन महिनामा विभिन्न १२७ वटा उद्योगमा २४ अर्ब १० करोड ४९ लाख ९५ हजार रुपैयाँ बराबरको वैदेशिक लगानी प्रतिबद्धता आएको हो ।
सो अवधिमा ८१ वटा उद्योगमा अटोमेटिक रुटमार्फत ७३ करोड सात लाख ४५ हजार रुपैयाँ बराबरको र प्रणालीमार्फत विभिन्न ४६ वटा उद्योगमा २३ अर्ब ३७ करोड ४२ लाख ५० हजार रुपैयाँको वैदेशिक लगानी प्रतिबद्धता आएको विभागले जनाएको छ ।
साउन महिनामा आएको वैदेशिक लगानी प्रतिबद्धतामध्ये १२५ वटा साना उद्योगको लागि र दुईवटा ठूलो उद्योगको लागि रहेको छ । जसमध्ये सबैभन्दा धेरै कृषि क्षेत्रमा ८३ प्रतिशत, पर्यटन क्षेत्रमा १३ प्रतिशत, उर्जा क्षेत्रमा १ प्रतिशत, उत्पादन क्षेत्रमा एक प्रतिशत, सेवा क्षेत्रमा एक प्रतिशत र सूचना प्रविधि क्षेत्रमा एक प्रतिशत रहेको छ ।
साथै, साउन महिनामा विभिन्न आठवटा कम्पनीको सेयर खरिद सम्झौता भएको र विभिन्न पाँच वटा कम्पनीको प्रविधि हस्तान्तरण सम्झौता भएको छ ।
सो अवधिमा विभिन्न विदेशी कम्पनीले दुई अर्ब ९० करोड ७७ लाख ८९ हजार ५४० रुपैयाँ रोयल्ट र लाभांश लगेको विभागको तथ्यांकमा उल्लेख छ ।
