भारत र चीनसँग द्विपक्षीय वार्ता र समन्वयमार्फत सीमा समस्या समाधानको पहल जारी

काठमाडौँ- परराष्ट्र मन्त्री आरजु राणा देउवाले भारत र चीनसँगको सीमा समस्या समाधानका लागि उच्चस्तरीय पहल जारी रहेको बताएकी छन् ।

सोमबार प्रतिनिधिसभामा परराष्ट्र मन्त्रालयको विनियोजनमाथि सांसदहरूले उठाएका प्रश्नको जवाफ दिने क्रममा मन्त्री राणाले स्थापित संयन्त्रमार्फत निरन्तर पहल भइरहेको उल्लेख गरिन् ।

मन्त्री राणाले उत्तर र दक्षिणतर्फको सीमा समस्या समाधानका लागि द्विपक्षीय उच्चस्तरीय वार्ता र स्थापित संयन्त्रहरूबाट पहल भइरहेको बताइन् । “सीमा सम्बन्धी समस्याका सन्दर्भमा द्विपक्षीय उच्चस्तरीय वार्ता एवं स्थापित संयन्त्रद्वारा समाधानका पहल जारी रहेको छ । साथै, यस विषयमा सम्बन्धित सरोकारवाला निकायहरूसँग निरन्तर समन्वय हुँदै आएको छ,” उनले भनिन् ।

उनले दुई वर्षदेखि रोकिएको भारत र चीनतर्फको सीमा समस्याबारे वार्ता हालै पुनः सुरु भएको र ती वार्ताबाट समाधान निस्किने अपेक्षा रहेको बताइन् ।