भारतसँग उचित समयमा बदला लिन्छौं- प्रधानमन्त्री शरीफ

काठमाडौँ । पाकिस्तानका प्रधानमन्त्री शाहबाज शरीफले भारतसँग बदला लिने दाबी गरेको छन् । बुधबार पाकिस्तानको संसदमा बोल्दै प्रधानमन्त्री शरीफले भारतले कायरतापूर्ण आक्रमण गरेको बताउदै यसको उचित समयमा बदला लिने बताएका हुन् । 

उनले अप्रिल २२ मा पहलगाममा भएको आक्रमणमा पाकिस्तानको कुनै सम्बन्ध नरहेको समेत दाबि गरेका छन् ।

संसदमा प्रधानमन्त्री शरीफले ५ वटा भारतीय लडाकु विमान खसालेको, जसमा ३ वटा राफेल लडाकु विमान रहेको बताएका छन् । 

उनले भारतको कारबाहीका कारण पाकिस्तानले जित हासिल गरेको बताए । उनले पाकिस्तानका तीनै सेनाले धेरै दिनदेखि तयारी गरिरहेका थिए, जसका कारण उनीहरूले भारतीय विमानहरूलाई खसाल्न सफल भएको संसदमा बताए ।

यसअघि, शाहबाज शरीफ राष्ट्रिय सुरक्षा परिषद् (एनएससी) को बैठकमा उपस्थित भएका थिए । यस बैठकमा भारतको आक्रमणलाई पाकिस्तानको सार्वभौमसत्ताको उल्लङ्घनको रूपमा लिइयो । बैठकमा सेना प्रमुख, आईएसआई प्रमुख र धेरै केन्द्रीय मन्त्रीहरू उपस्थित थिए । बैठकमा शरीफले यो कार्यबाट भारतले हामीलाई युद्धको लागि उक्साएको आरोप लगाएका थिए ।

पाकिस्तानी अखबार डनको रिपोर्ट अनुसार राष्ट्रिय सुरक्षा परिषद्को बैठक समाप्त भएपछि, पाकिस्तानी प्रधानमन्त्रीको कार्यालयले आधिकारिक विज्ञप्ति जारी गर्दै हामीलाई समय, स्थान र हामीले रोजेको तरिकाले प्रतिक्रिया दिने अधिकार रहेको बताएका थिए ।

उनले ८० वटा भारतीय जहाजले पाकिस्तानका ६ शहरहरूमा आक्रमण गरेको बताउदै यसमा पीओकेका दुई क्षेत्रहरू पनि समावेश रहेको बताए । 

भारतीय वायुसेनाले मंगलबार राति १:०५ बजे पाकिस्तान र पीओके अर्थात् पाकिस्तान प्रशासित कश्मीर भित्र हवाई आक्रमण गरेको थियो। यस आक्रमणमा ९ वटा आतंककारी लुकेका ठाउँहरूलाई निशाना बनाइएको छ। यसमा १०० भन्दा बढी आतंककारीहरू मारिएको बताइएको छ ।

भारतले गरेको यो बदला लिने कारबाही पहलगाम आक्रमणको १५ दिनपछि गरिएको थियो र यसलाई 'अपरेशन सिन्दूर' नाम दिइएको थियो। यो नाम ती महिलाहरूलाई समर्पित गरको छ, जसका पतिहरू २२ अप्रिलमा पहलगाममा आतंककारीहरूले मारेका थिए ।