नेपाली नेतालाई के ‘पैगाम’ दिएर फर्किँदैछन् भाजपा विदेश विभाग प्रमुख चौथाईबाले?

काठमाडौं– भारतीय जनता पार्टी (भाजपा)का विदेश विभाग प्रमुख रहेका नेता बिजय चौथाईबालेले नेपालमा उच्च तहका राजनीतिक भेट सकेका छन्। उनी शुक्रबार नयाँ दिल्ली फर्किनेछन्।

बुधबार काठमाडौंमा उत्रिएका उनले प्रधानमन्त्री केपी शर्मा ओली, नेपाली कांग्रेसका सभापति शेरबहादुर देउवा, प्रतिपक्षी दलका नेता पुष्पकमल दाहाल प्रचण्डसहित मधेसी दलका नेतासँग भेट गरेका छन्।

नेपालमा राजनीतिक अस्थिरताकाबीच भारतीय पक्षको भ्रमणलाई महत्वका साथ हेरिएको छ। भारत र पाकिस्तानबीच युद्धको शंखघोषण भएको बेला चौथाईबालेको काठमाडौं भ्रमण नेपाली भूमीको प्रयोग नहोस् भन्ने कोणमा समेत रहेको बताइन्छ। 

उच्च स्रोतले भन्यो,‘पाकिस्तानी र चिनियाँ पक्षले नेपालको भूमीमा बसेर भारतबिरोधी काम गर्न नपाउन् भन्ने चिन्ता पनि रहेछ। त्यो पनि जाहेर भएको छ।’

नेपालमा तिव्र भारतबिरोधी राष्ट्रवाद हावी हुने गरेको र अहिले पाकिस्तानसँगको विवादमा त्यसको उपयोग हुन सक्ने चिन्ता भारतीय संस्थापनको रहेको छ।

अर्कातिर नेपालको सत्ता समीकरणमा पनि चासो राखिएको चर्चा छ। यद्यपि भारतले तत्कालै सरकारको विकल्पको चाहना भन्दा पनि आफ्नो सुरक्षा चिन्तालाई महत्वमा राखेको पाइएको स्रोतको दाबी रहेको छ।

नेपाल–भारत खुला सीमा रहेका कारण यसको प्रयोग गर्न सक्ने विषयमा केन्द्रित रहेको भन्ने बुझिएको छ।

भारतीय मिडियामा अहिले नेपाली भूमी हुँदै भारतबिरोधी गतिविधिमा आतंकवादी र पाकिस्तान पनि सक्रिय हुन सक्ने चर्चा चलाइन थालिएको छ। 

कतिपय इतिहासका कालखण्डमा भारतलाई गलाउनका लागि नेपाली भूमी हुँदै खुला सीमा र अन्तर्राष्ट्रिय विमानस्थलबाट जहाज अपहरण पनि नजीरका रुपमा बुझ्न सकिन्छ।

चौथाईबालेले नेपाली नेतालाई यहि सन्देश (पैगाम) दिएर फर्किने उच्च स्रोतले जनाएको छ। यसबारेको आधिकारिक जानकारी परराष्ट्र मन्त्रालयले दिने बताइन्छ।