बाँकेका बालक हत्याको कारुणिक यथार्थः दोस्रा पतिसँग मिलेर यशोदाले रचेको अपराधको जालो

काठमाडौं– बाँकेमा एक नौ बर्षीय बालक हत्या गरी गाडेको अवस्थामा शव फेला परेको थियो। यो हत्या प्रकरणको कारुणिक यथार्थ प्रहरी अनुसन्धानका क्रममा खुल्ने क्रममा रहेको छ।

बैजनाथ गाउँपालिका वडा नम्बर–४ नौलापुरस्थित कुलोमा बालकको शव गाडिएको अवस्थामा भेटिएको थियो।

बालक हराएको सातौं दिनमा प्रहरीले सडेगलेको अवस्थामा गत शव फेला पारी यस प्रकरणमो खोजीनीति थालेको थियो। यो १० दिनअघिको कुरो हो।

घटनाको अनुसन्धानका क्रममा कुशलको हत्यामा उनकै आमा ३२ वर्षीया यशोदा बुढा र उनका दोस्रा पति ३३ वर्षीय निरकनाथ योगीको संलग्नता भेटिएको छ।

दुवैलाई पक्राउ गरी हिरासतमा राखी अनुसन्धानको काम जारी राखिएको छ।

प्रमुख विवादचाहिँ हत्या गरिएका बालक कुशल कसका छोरा हुन् भन्ने थियो। 

यशोदा र निरकनाथ दुवै अहिले इलाका प्रहरी कार्यालय कोहलपुरको हिरासतमा छन्। 

निरकनाथ यशोदाका दोस्रो पति हुन्। पहिलो पति बाँकेको जानकी गाउँपालिका ३ घर भएका व्यक्तिको मृत्यु भएको ७ बर्षअघि भयो। पहिला पतिबाट नै कुशलको जन्म भएको थियो।

पहिलो पतिको मृत्युपछि मजदुरी गर्ने दैलेखको दुल्लु नगरपालिका–११ का निरकनाथसँग विवाह गरिन्।

यहाँसम्म कि आफूलाई एकल महिला बताएर उनले जानकी गाउँपालिका वडा नम्बर ३ बाट भत्तासमेत लिँदै आएकी यशोदाले दोस्रो बिहे गरेको पनि ढाँटेकी थिइन्। यो अनुसन्धानका क्रममा खुलेको तथ्य हो। 

उनीहरू कोहलपुर नगरपालिका ११ कृषि चोकमा बस्दै आएका थिए।

इलाका प्रहरी कार्यालय कोहलपुरका अनुसार यशोदाले कुशललाई कोहलपुर माविमा पढाएकी थिइन्। उनी कक्षा ३ मा पढ्थे। 

विद्यालयमा उनले कुशलको बाबुको नाम सन्तोष खनाल लेखाएकी थिइन्। यद्यपि कुशलको बाबु मुस्लिम समुदायको रहेको खुलेको छ।

निरकनाथलाई भने अनेक भनेर कुशल आफ्नो छोरा नभएको विश्वास दिलाउँदै आएकी थिइन्। कुशललाई भने इद पर्वमा घर पठाउँथिन्। उनी नेपालगन्जसम्म जान्थिन्। 

कुशल कसको छोरा हो भन्ने विषयमै यशोदा र निरकनाथबीच विवाद भएको प्रहरी अनुसन्धानबाट खुलेको छ। निरकनाथले कुशल यशोदाका नै छोरा रहेको दाबी गरे। लामो समयसम्म विवाद चर्कियो। अनि दुवै मिलेर कुशलको हत्या गरे।

दुई जना मिलेर छोराको हत्या गरेपछि यशोदा आफैले छोरा हराएको भनेर प्रहरीमा निवेदन दिएकी थिइन्। निवेदन दिए पनि उनले त्यति धेरै चासो नदेखाएपछि प्रहरीको अनुसन्धानले नयाँ मोड लियो। अनुसन्धान यशोदा र निरकनाथतिर सोझियो।

वैशाख ८ गतेदेखि हराएको भनिएको कुशलको शव नौलापुरमा पानी नआउने कुलोमा गाडिएको अवस्थामा भेटिएको थियो। शव भेटिएको ठाउँ उनीहरूको डेराभन्दा झन्डै १३ किलोमिटर पर हो।

प्रहरीका अगाडि यशोदाले नै शव कुशलकै रहेको सनाखत गरेकी थिइन्। कुशल मृत भेटिएको खबर पाएपछि उनका हजुरबुवा सरिखत अली शेखले यशोदाविरूद्ध जाहेरी दिएका थिए। यसपछि भने प्रहरीले अनुसन्धान मोड्यो। 

‘पक्राउ गरी प्रारम्भिक बयान लिने काम भयो’, प्रहरी स्रोतले भन्यो,‘यस क्रममा हत्यामा उनीहरुको संलग्नता देखिएको छ। घरमा नै हत्या गरेर गाडेको हो कि शव भेटिएको ठाउँमा नै हत्या गरिएको हो, अनुसन्धान जारी छ।’