काठमाडौँ - नेपालले पश्चिम एसिया क्षेत्रमा विकसित घटनाक्रमको शान्तिपूर्ण समाधान खोज्न आग्रह गरेको छ ।

आइतबार परराष्ट्र मन्त्रालयले विज्ञप्तिमार्फत पश्चिम एसिया क्षेत्रको विकासलाई नजिकबाट नियालिरहेको भन्दै यस क्षेत्रमा बढ्दो तनावप्रति चिन्तित भएको जनाएको हो ।

विवादको शान्तिपूर्ण समाधानमा दृढ विश्वास रहेको भन्दै नेपाल सरकारले बल प्रयोगको निन्दा गरेको छ ।

‘सम्बन्धित सबै पक्षलाई अधिकतम संयम अपनाउन र वार्ता तथा कूटनीतिको प्रयोग गरी शान्ति स्थापना गर्न आह्वान गर्दछौँ,’ जारी विज्ञप्तिमा उल्लेख छ ।